వయోబేధం లేకుండా మహిళలపై అకృత్యాలు పెచ్చరిల్లిపోతున్నాయి. ఎక్కడపడితే అక్కడ మహిళలపై దాడులు జరుగుతున్నాయి. చిన్నపిల్లల్లోనూ నేరప్రవృత్తి పెరిగిపోతోంది. తాజాగా దేశ రాజధాని ఢిల్లీలో ఘోరం జరిగింది. పాఠశాల టాయిలెట్‌లో మైనర్ బాలికను తోటి విద్యార్థే లైంగికంగా వేధించాడు. ఈ మొత్తం తతంగాన్ని సెల్‌ఫోన్‌లో చిత్రీకరించాడు.
వివరాల్లోకి వెళితే.. ఢిల్లీ చెందిన విద్యార్థిని ఎప్పటిలాగే గతవారం స్కూల్‌కు వెళ్లింది. సాయంత్రం స్కూల్ ముగిశాక టాయిలెట్‌కు వెళ్లింది. అదే సమయంలో తోటి విద్యార్థి టాయిలెట్ రూమ్‌లో ఆ బాలికను లైంగికంగా వేధించాడు. బలవంతంగా ముద్దుపెట్టుకున్నాడు. ఆ తతంగాన్ని మరో ఇద్దరు కుర్రాళ్లు ఫోన్ కెమెరాల్లో రికార్డ్ చేశారు.
ఆ దృశ్యాలను ఇతరులతో షేర్ చేసి వైరల్ చేయడంతో విషయం బయటికి పొక్కింది. ఈ ఘటనపై విద్యార్థిని తల్లిదండ్రుల ఫిర్యాదు మేరకు పోలీసులు పోక్సో చట్టం కింద కేసు నమోదు చేసుకుని దర్యాప్తు జరుపుతున్నారు. ముగ్గురు విద్యార్థులను అదుపులోకి తీసుకుని విచారిస్తున్నారు.
