అప్పుడే పుట్టిన శిశువు బరువు సాధారణంగా మూడు లేక నాలుగు కిలోల బరువుంటుంది. కానీ కర్ణాటకలోని హాసన్ జిల్లా కేంద్రంలోని ప్రభుత్వ ఆస్పత్రిలో జన్మించిన ఓ ఆడ శిశువు బరువు మాత్రం ఏకంగా 7.250 కిలోల బరువుతో పుట్టింది. యావత్ ప్రపంచంలోనే ఇప్పటి వరకు శిశువుల బరువులో ఇదో రికార్డు సృష్టిస్తుందని వైద్యులు అంటున్నారు.
ఈ వివరాలను పరిశీలిస్తే.. హాసన్‌కు సమీపంలోని బేలూరు తాలుకా దొడ్డహళ్లికి చెందిన నందినికి పురుటి నొప్పులు రావడంతో సోమవారం కుటుంబ సభ్యులు ఆస్పత్రికి తీసుకొచ్చారు. గర్భంలో శిశువు లావుగా ఉండటంతో సాధారణ ప్రసవం కాదని వైద్యులు చెప్పడంతో ఆపరేషన్ చేసి శిశువును బయటకు తీశారు. మొదట ఏడు కిలోలు దాటగా, మంగళవారం ఉదయం మరోసారి బరువు చూడగా 6.800 కిలోలు ఉన్నట్లు తెలిసింది. శిశువును జాగ్రత్తగా పర్యవేక్షిస్తున్నట్లు వైద్యులు వెల్లడించారు.
