ఇంటి పేరు మార్చినంత మాత్రాన కులం పేరు మారిపోదని బాంబే హైకోర్టు స్పష్టం చేసింది. చెల్లుబాటైన కుల ధ్రువీకరణ పత్రాన్ని సమర్పించినా తన ఇంటిపేరు మారిందనే కారణంతో వైద్య కళాశాలలో పీజీ సీటు పొందలేకపోయిన విద్యార్థికి బాంబే హైకోర్టు ఊరటనిచ్చింది. ఇంటిపేరు మారినంతమాత్రాన కులం మారిపోదని ఈ నెల 23న ఇచ్చిన తీర్పులో స్పష్టం చేసింది.
శంతను హరి భరద్వాజ్‌ అనే ఎస్టీ విద్యార్థి ఎం.బి.బి.ఎస్‌. పూర్తి చేశాక పీజీ కోర్సులో ప్రవేశం కోసం దరఖాస్తు చేసుకున్నారు. ఇంటిపేరు మారిందనే కారణంతో అధికారులు సీటు నిరాకరించారు. తమ ఇంటిపేరును సప్‌కాలే నుంచి భరద్వాజ్‌గా 1999లోనే మార్చుకుని, రాజపత్రంలోనూ ప్రకటించామని విద్యార్థి ఆధారాలు చూపించారు. ఆ ప్రకారం ఇంటి పేరును అధికారికంగా మార్చుకున్నట్లు చెప్పారు. ఇతర అర్హతలు సరిచూసి, విద్యార్థి అభ్యర్థనను పరిగణనలో తీసుకోవాలని సంబంధిత కళాశాలను హైకోర్టు ఆదేశించింది.
