ఓహియోలోని సిన్సినాటి జూలో ఇదో ఎవ్వరూ ఊహించని దారుణం చోటుచేసుకుంది. మూడేళ్ల చిన్నారి కాపాడే ప్రయత్నంలో తప్పనిసరి పరిస్థితుల్లో ఓ గొరిల్లాను జూ సిబ్బంది చంపేశారు. ఈ ఘటన అమెరికాలోని ఒహైయో ప్రాంతంలో చోటుచేసుకుంది. పూర్తి వివరాల్లోకి వెళితే... ఓ కుటుంబం శనివారం జూ చూడడానికి వచ్చారు. అనుకోకుండా 17 ఏళ్ల గొరిల్లా ఉండే ఎన్‌క్లోజర్‌లో ఆ కుటుంబానికి చెందిన ఓ మూడేళ్ల బాలుడు ప్రమాదవశాత్తు 12 అడుగుల లోతున్న గొరిల్లాల ఎన్‌క్లోజర్‌లో అదుపుతప్పి పడిపోయాడు.
ఆ సమయంలో అక్కడ మూడు గొరిల్లాలు ఉన్నాయని, వీటిలో గొరిల్లాలు మాత్రం దూరంగా వెళ్లిపోగా, హరాంబే అనే 17 ఏళ్ళ వయసున్న గొరిల్లా మాత్రం ఆ చిన్నారిని పట్టుకుని విసరడంతో బాలుడు తీవ్రంగా గాయపడ్డాడు. దాదాపు 10 నిమిషాలు ఆ చిన్నారి ఎన్‌క్లోజర్‌లోనే ఉండిపోయాడు. దీంతో అప్రమత్తమైన సిబ్బంది బాలుడ్ని రక్షించే ప్రయత్నంలో ఆ గొరిల్లాను కాల్చి చంపారు. అనంతరం బాలుడిని సమీపంలోని ఆసుపత్రికి తరలించారు. ప్రస్తుతం బాలుడికి చికిత్స అందిస్తున్నారు. ఈ వీడియో జూ అధికారులు విడుదల చేశారు.
