ఒక చీటింగ్ కేసులో కేంద్ర సహాయ మంత్రిగా ఉన్న నిశిత్ ప్రామాణిక్‌కు బెంగాల్ కోర్టు ఒకటి అరెస్టు వారెంట్ జారీచేసింది. బెంగాల్‌లోని అలీపూర్‌దువార్ రైల్వే స్టేషన్ పరిధిలో బంగారం దుకాణంలో, బీర్‌పాడాలోని రెండు బంగారు దుకాణాల్లో 2009లో చోరీ జరిగింది. ఈ కేసుల్లో ప్రామాణిక్‌తో పాటు మరో వ్యక్తి నిందితులుగా ఉన్నారు. ఈ కేసు విచారణ గత 13 యేళ్లుగా సాగుతోంది.
ఈ నేపథ్యంలో అలీపూర్‌దువార్ జ్యూడిషియల్ మేజిస్ట్రేట్ కోర్టు బుధవారం ఈ కేసును విచారించి కేంద్ర మంత్రికి అరెస్టు వారెంట్ జారీచేసింది. ఈ వారెంట్ జారీ నేపథ్యంలో తమ తదుపరి చర్య ఏంటో ప్రామాణిక్ తరపు న్యాయవాది దులాల్ ఘోష్ వెల్లడించేందుకు నిరాకరించారు.
కాగా, బెంగాల్ హైకోర్టు ఆదేశం మేరకు ఉత్తర 24 పరగణాల జిల్లా ఎంపీ/ఎమ్మెల్యేల కోర్టు నుంచి ఈ కేసును అలీపూర్‌దువార్ కోర్టుకు బదిలీ చేశారు. కాగా, ఈ కేసులో నిందితుడిగా ఉన్న ప్రామాణిక్ గత 2019 లోక్‌సభ ఎన్నికల్లో పోటీ చేసి గెలుపొందారు. ఆ తర్వాత ఆయనకు కేంద్ర మంత్రివర్గంలో సహాయ మంత్రిగా చోటు దక్కింది.
