భారత్ రాజధాని న్యూఢిల్లీలో అత్యంత పటిష్ట భద్రత ఉండే ఔరంగజేబు రోడ్డులో సోమవారం బాంబు పేలుడు సంభవించిన ఘటనలో ఇరాన్ హస్తం ఉండవచ్చని ఇజ్రాయిల్ ప్రధాని బెంజమిన్ నెత్యన్యాహు అభిప్రాయపడ్డారు. అలాగే జార్జీయాలోని టిబిలిసిలో కూడా ఇజ్రాయిల్ దౌత్యకార్యాలయ వాహనంలో ఓ బాంబును నిర్వీర్యం చేసిన సంఘటనలో కూడా ఇరాన్ కుట్ర దాగి వుండొచ్చని సందేహం వ్యక్తం చేశారు.
సొంత పార్టీ చట్టసభ్యులను ఉద్దేశించి ఇజ్రాయిల్ ప్రధాని బెంజమిన్ నెత్యన్యాహూ మాట్లడుతూ ఈ కుట్రల వెనుక ప్రపంచంలో పెద్ద ఎత్తున ఉగ్రవాదులను ఎగుమతి చేస్తున్న ఇరాన్ అని స్పష్టం చేశాడు. అయితే ఈ సంఘటనలో ఇరాన్, దాని మద్దతు గల హిజ్బుల్ (లెబనాన్‌కు) చెందిన ఉగ్రవాద సంస్థ కారణమని పేర్కొన్నారు.
ఇదే అంశంపై భారత్‌లో ఇజ్రాయిల్ రాయబారి మాట్లాడుతూ ఈ సంఘటనపై ఇజ్రాయిల్ ప్రధాని బెంజమిన్ నెత్యన్యాహూ ఇక్కడి వారి యోగక్షేమాలను అడిగి తెలుసుకున్నారని, ఈ సంఘటన అనుకోనిది కాదని అయితే ఇజ్రాయిల్ ప్రజలను ఉద్దేశించి జరుగుతున్న దాడులుగా ఒక టీవీ ఛానెల్‌కు తెలిపారు. అయితే భారత్‌లోని తమ అధికారుల భద్రతపై తమకు ఎలాంటి అనుమానాలు లేవని, భారత్ అధికారులపై తమకు పూర్తి విశ్వాసం ఉందని తెలిపారు.
