ఉత్తర ఇరాక్‌లో ఘోరం జరిగింది. ఓ పెళ్లి మండపండలో జరిగిన భారీ అగ్నిప్రమాదంలో 100 మంది ప్రాణాలు కోల్పోయారు. మరో 150 మంది వరకు గాయపడ్డారు. దీంతో మృతుల సంఖ్య మరింతగా పెరిగే అవకాశం ఉందని అధికారులు తెలిపారు. నినేవే ప్రావిన్స్‌లో క్రైస్తవుల ప్రాబల్యం ఉన్న హమ్హానియా ప్రాంతంలో ఈ ఘోరం జరిగింది. పెళ్లి మండపంలో ఎగిసిపడుతున్న వీడియోలు సోషల్ మీడియాలో వైరల్ అవుతున్నాయి.
పెళ్లి మండపం మొత్తాన్ని మంటలు కాల్చి బూడిద కుప్పగా మార్చేశాయి. క్షతగాత్రులను సమీపంలోని ఆసుపత్రులకు తరలించారు. ఈ దురదృష్టకర ఘటన బారినపడిన వారికి సహాయ కార్యక్రమాలు అందించేందుకు అన్ని చర్యలు తీసుకుంటున్నట్టు ఆరోగ్యశాఖ అధికార ప్రతినిధి సైప్ అల్ బద్ర్ తెలిపారు.
ప్రధానమంత్రి మహమ్మద్ షియా అల్ సుడానీ ఈ ఘటనపై దర్యాప్తునకు ఆదేశించారు. అగ్ని ప్రమాదానికి గల కారణాలు అధికారికంగా తెలియనప్పటికీ కుర్దిష్ టెలివిజన్ న్యూస్ చానల్ మాత్రం బాణసంచా కారణంగానే ప్రమాదం సంభవించినట్టు పేర్కొంది.
