అమెరికా అధ్యక్ష ఎన్నికలు వచ్చే నెలలో జరుగనున్నాయి. ఈ ఎన్నికల ప్రక్రియలో భాగంగా, ఇప్పటికే ముందస్తు పోలింగ్ ప్రారంభమైంది. అయితే, అధ్యక్ష పీఠం కోసం పోటీపడుతున్న ప్రస్తుత అధ్యక్షుడు డోనాల్డ్ ట్రంప్‌తో పాటు.. డెమొక్రటిక్ అభ్యర్థి జో బైడెన్‌లు హోరాహోరీగా ప్రచారం చేస్తున్నారు. ఈ క్రమంలో వారిద్దరూ ఒకరిపై ఒకరు విమర్శలు సంధిస్తున్నారు.
అయితే, తన ప్రత్యర్థి, డెమొక్రటిక్ అధ్యక్ష అభ్యర్థి జో బైడెన్‌కు సంబంధించిన అవినీతి వార్తలను ఇరు మీడియా సంస్థలు ఉద్దేశపూర్వకంగానే ప్రజలకు తెలియకుండా దాచిపెడుతున్నాయని డోనాల్డ్ ట్రంప్ ఆరోపిస్తున్నారు. ఎందుకో తెలియదుగానీ... జో పై అమెరికా మీడియా తెగ ప్రేమ చూపిస్తోందంటూ సెటైర్లు వేశారు.
మీడియా వాళ్లు బైడెన్, ఆయన ఫ్యామిలీకి వ్యతిరేకంగా వార్తలు రాయడానికి సిద్ధంగా లేరని ఆరోపించారు. బైడెన్‌పై ఎందుకంత ప్రేమ అని ప్రశ్నించారు. మాస్కో మాజీ మేయర్‌కు అత్యంత సన్నిహితుడైన జో బైడెన్‌కు రష్యా నుంచి 3.5 మిలియన్‌ డాలర్లు అందినట్లు ట్రంప్ ఇటీవల ఆరోపించిన సంగతి తెలిసిందే.
అలాగే చైనా, ఉక్రెయిన్ నుంచి కూడా బైడెన్ కుటుంబానికి భారీగా నగదు అందిందని ఆరోపించారు. కాగా, ఈ ఆరోపణలను బైడెన్, ఆయన కుటుంబ సభ్యులు తీవ్రంగా ఖండించారు. బైడెన్ నుంచి లబ్ధి పొందిన మీడియా సంస్థలు, టెక్‌ కంపెనీలు ఆయనను రక్షించేందుకు తెగ ఆరాట పడుతున్నాయని ట్రంప్ మీడియాపై దుమ్మెత్తిపోశారు.
