హోలీ పండుగ ఈ నెల 9వ తేదీ రాబోతోంది. పండుగ నాడు వివిధ రంగులు తమ శరీర చర్మానికి హాని కలుగుతాయని చాలామంది వాటి జోలికి వెళ్ళరు. ఆ పండుగ వచ్చిందంటే కొందరు అమ్మాయిలు అబ్బాయిలు బయటకు రావాలంటేనే భయపడుతుంటారు.
హోలీ రంగులతో చర్మసౌందర్యం పాడైపోతుందని భయపడుతుంటారు. ఇలాంటి వారు భయపడాల్సిన పనిలేదు. శరీరంపై పడ్డ విభిన్న రంగులను తొలగించుకునేందుకు కొన్ని చిట్కాలు ఉపయోగిస్తే ఇంటిల్లిపాది హోలీ రంగులతో ఎంచక్కా ఎంజాయ్ చేయవచ్చు, మీరు కూడా మీ స్నేహితులకు రంగులను చల్లి హోలీ పండుగను జరుపుకోవచ్చు.
1. ముల్లంగి రసంలో పాలు, బేసన్ లేదా మైదా పిండిని కలుపుకుని పేస్ట్‌లా చేయండి. ఈ మిశ్రమాన్ని ముఖానికి రుద్దుకున్న తర్వాత చల్లటి నీటితో ముఖాన్ని, చేతులు, కాళ్ళను శుభ్రం చేసుకోండి.
2. ఒకవేళ మీ శరీర చర్మానికి ఎక్కువ రంగులు అంటుకుపోతే రెండు చెంచాల జింక్ ఆక్సైడ్, రెండు చెంచాల క్యాస్టర్ ఆయిల్ కలుపుకుని ఆ మిశ్రమాన్ని ముఖానికి, శరీరంలోని ఏయే ప్రాంతాలలో రంగులు అధికంగా ఉండాయో ఆయా ప్రాంతాలలో పూయండి. తర్వాత స్పాంజ్‌తో శరీర చర్మాన్ని తుడవండి. ఇరవై ఐదు నిమిషాల తర్వాత సబ్బుతో స్నానం చేయండి. మీ చర్మంపైనున్న రంగులు మటుమాయమౌతాయి.
3. జొన్న పిండి, బాదం నూనెను కలుపుకోండి. ఈ మిశ్రమాన్ని చర్మంపై పూయండి. దీంతో చర్మంపైనున్న రంగును సునాయాసంగా తొలగించుకోవచ్చు.
