కొన్ని రకాల అనారోగ్యాలను ఇంట్లోవుండే ఆహర పదార్థాలతోనే నయం చేసుకోవచ్చు. ఈ రకమైన గృహ వైద్యం గురించి తెల్సుకుంటే తరచూ ఎదుర్కొనే ఇబ్బందులను కొంతవరకు తగ్గించుకోవచ్చు. ఇప్పుడు వస్తున్న మందులకి, చేస్తున్న చికిత్సలకి ప్రత్యామ్నాయంగా ఈ చిట్కాలెంతగానో ఉపయోగపడతాయి. అవేంటే ఇప్పుడు తెల్సుకుందాం.
డయేరియా సమస్య ఉన్నవారు యాపిల్‌ను తురిమి దాని రంగు మారిన తర్వాత నెమ్మదిగా తినాలి. డయేరియాకి ఎప్పటి నుంచో వున్న పరిష్కారం నేరేడుపండ్లు. నేరేడుపండ్ల జామ్‌ని ప్రతి 3 గంటలకోసారి తీసుకుంటే ఉపశమనం కలుగుతుంది.
వెక్కిళ్ళు సమస్య ఉన్నప్పుడు ఓ కప్పు నీళ్ళలో చెంచాడు మెంతులువేసి మరగ కాచిన నీటిని తాగితే తగ్గిపోతుంది. కాల్షియం అధికంగా ఉన్న పెంటాసిడ్ మాత్రలు రెండు మూడు తిన్నా కూడా వెంటనే వెక్కిళ్ళు పోతాయి. పెద్ద గ్లాసుడు మంచినీళ్ళును నెమ్మదిగా తాగినా ఫలితం తప్పనిసరిగా కనబడుతుంది.
పాదాలకు కాయలు వస్తే ఆముదం లేదా ఇ విటమిన్ క్యాప్సూల్స్‌తో రుద్దితే పోతాయి. ప్రతీరోజు ఇదేవిధంగా రెండు వారాలపాటు రుద్దాలి. ఒక్కోసారి పాదాలకు వాసనొస్తుంది. అలాంటి పాదాలకు ఈ చిట్కాను ప్రయత్నించండి. ఓ పాత్రలో నీళ్ళుపోసి నాలుగు లేదా ఆరు టీ బ్యాగ్‌లను పావుగంట నుంచి ఇరవై నిమిషాల వరకూ నానబెట్టాలి. ఆ నీళ్ళను పెద్ద బేసిన్‌లో పోసి పాదాలు మునిగేంతగా నీళ్ళు కలిపి అరగంటసేపు పాదాలను ఆ నీళ్ళలో ఉంచాలి. పాదాల వాసనకు కారణమయ్యే బాక్టీరియానీటీలో ఉన్న' టానిన్' పోగోతుంది. తర్వాత పాదాలను శుభ్రంగా కడుక్కోవాలి. ఇలా రోజుకి కొన్ని సార్లు చొప్పున రెండు వారాలపాటు చేస్తే వాసన పోతుంది.
మోషన్‌ సిక్‌నెస్‌కి పిప్పరమెంట్ ఆయిల్ కొన్ని చుక్కలను అర స్పూను పంచదారకి కలుపుకుని తినాలి. పిప్పరమెంట్ వాడిన టీ తాగవచ్చు. మామిడి, బొప్పాయి, ఫైనాపిల్, కివి పండ్లు, వీటిని తింటే ఫలితముంటుంది. పొట్టలో ఎంత ఇబ్బందిగా వున్నా కొన్ని పండ్లలోని ఎంజైముల వల్ల తగ్గిపోతుంది.
అజీర్ణం వల్ల గ్యాస్ సమస్య మొదలవుతుంది. ఉపశమనానికి అల్లం లేదా సోపుగింజలు వాడిన టీ తాగాలి. మోషన్‌సిక్‌నేస్ సమస్య పోవాలంటే ఒక గ్లాసు మంచి నీటిలో అరస్పూన్ అల్లంపొడిని కలిపి తాగాలి.
డీ హైడ్రేషన్, జలుబుల కారణంగా ముక్కునుంచి రక్తస్రావం అవుతుంటుంది. ఎలర్జీవల్ల, గాయం వల్ల కూడా ముక్కు నుంచి రక్తం కారవచ్చు. ముక్కు నుంచి రక్త స్రావం అవుతున్నప్పుడు నిటారుగా, తల కొంచెం ముందుకు వుండేలా కూర్చోవాలి. తలను ముందువైపు వుండేలా వంచితే రక్తస్రావం కొంచెం వరకు తగ్గుతుంది.
రక్తం అలా కారుతూ కంఠంవైపు జారకుండా తలను ముందుకు వంచాలి. నోటితో గాలి పీలుస్తూ, నాసికా రంధ్రాలకు సరిగ్గా పైన ముక్కుకి వుండే మృదువైన భాగాన్ని వత్తి పట్టుకోవాలి. రక్త స్రావం ఆగడానికి పదినిమిషాలపాటు పట్టుకుని వుండాలి. రోజంతా బాగా నీళ్ళు తాగుతూ ఉండాలి. ముక్కు దూలంపై కోల్డ్ కంప్రెస్‌ను లేదా ఐస్ ప్యాక్‌ను ఉంచినా ఫలితం కనపడుతుంది. ముక్కు నుంచి రక్త స్రావం 15 నిమిషాల్లోగా ఆగకపోతే, వెంటనే డాక్టర్ ని సంప్రదించాలి.
చిన్న చిన్న గాయాలకు ఐసుగడ్డలను లేదా బాగా చల్లగా వున్న వేటినైనా గాయాలు, బెణుకులు, దెబ్బలు, నొప్పులకి గురైన శరీర భాగంపై కాసేపు ఉంచితే ఉపశమనం కలుగుతుంది. గోరువెచ్చని నీళ్ళుపోసిన గిన్నెలో తురిమిన ఉల్లిపాయ, బంగాళాదుంపల్ని వేసి నొప్పి పెడుతున్న చేతిని లేదా పాదాన్ని ఆ నీళ్ళలో కాసేపు ఉంచాలి. అలా ఉంచితే నొప్పి మటుమాయం.
