ప్రస్తుతం స్మార్ట్ ఫోన్ లేదా ఫోన్ ఉన్న ప్రతి ఒక్కరి చేతిలో హెడ్ఫోన్స్ ఉండటం మనం చూస్తుంటాం. వీటిని చెవులకు ధరించి రేయింబవుళ్లు పాటలు వింటూనే నిద్రలోకి జారుకుంటుంటారు. చాలా తక్కువ మంది మాత్రమే నిద్రకు ఉపక్రమించాక ఆ హెడ్ఫోన్స్ తీసి పడుకుంటారు.
ఇలా నిద్రపోయేటపుడు పడుకోవడం వల్ల రాత్రి నుంచి ఉదయం వరకు ఆ హెడ్ఫోన్స్ అలానే చెవులకు ఉండిపోతాయి. ఇలా రాత్రంతా చెవులకు హెడ్ఫోన్స్ తగిలించుకుని సంగీతం వినడం ఆరోగ్యానికి హానికరమని వైద్యులు హెచ్చరిస్తున్నారు.
వాస్తవానికి నిద్రించేటప్పుడు మెదడు పూర్తిస్థాయి విశ్రాంతి తీసుకుంటుంది. ఈ క్రమంలో రాత్రంతా హెడ్‌ఫోన్స్‌ను అలాగే ఉంచి నిద్రిస్తే శరీర కార్యక్రమాలకు ఆటంకం కలుగుతుంది. ప్రధానంగా విశ్రాంతి దశలో ఉండే మెదడుపై తీవ్రమైన ఒత్తిడి పడుతుంది. నిద్రలేమి, అలసట వంటి ఇతర సమస్యలు కూడా వస్తాయని ఆరోగ్య నిపుణులు హెచ్చరిస్తున్నారు.
