Publish Date: Tue, 30 Sep 2008 (13:58 IST)
Updated Date: Tue, 30 Sep 2008 (13:56 IST)
పిల్లలూ...! "గుమ్మడికాయల దొంగంటే భుజాలు తడుముకోవడం" అనే సామెత గురించి ఈరోజు మనం తెలుసుకుందాం..! ఎవరైనా చేసిన తప్పును తనకు తానుగానే తెలియజేసేలా ప్రవర్తించినప్పుడు ఈ సామెతను వాడుతుంటారు. ఈ సామెత వెనుక ఓ చిన్నపాటి కథ కూడా ఉంది.. అదేంటో చూద్దామా..!
ఒక ఊర్లో ఓ బూడిద గుమ్మడి చెట్టు ఉండేదట. దానికి కాసిన కాయలను కోసుకుందామని ఆ చెట్టు యజమాని వెళ్లేసరికి అవి కనిపించవు. మన చెట్లో ఉండే గుమ్మడికాయలను ఎవరో దొంగిలించుకెళ్లారని భార్యతో చెబుతుంటాడు అతను. ఇంతలో పక్కింట్లో కిటికీ పక్కగా నిల్చుని వింటోన్న సూరయ్య వెంటనే తన భుజాలను తడుముకున్నాడట. దాంతో ఆ కాయలను అతడే దొంగిలించాడేమోనన్న ఇంటివాళ్లకు అనుమానం వస్తుంది.
దొంగతనంగా గుమ్మడికాయలను తీసుకెళ్తున్నప్పుడు వాటికున్న బూడిద తన భుజాలకు అంటిందేమోనని, ఆ బూడిదను ఇంటివాళ్లు చూసి అలా మాట్లాడుకుంటున్నారేమోనని సూరయ్య వెంటనే భుజాలను తడుముకున్నాడు. అప్పటిదాకా అనుమానం రాని వాళ్లకు కూడా అతను భుజాలు తడుముకోవడం చూసి అతడే దొంగిలించి ఉంటాడని అందరూ నిర్ధారణకు వచ్చేశారట..!
