పిల్లలూ...! "అన్నీ ఉన్న ఆకు అణిగిమణిగి ఉంటుంది, ఏమీలేని ఆకు ఎగిరెగిరి పడుతుంది" అనే సామెత గురించి ఈరోజు మనం తెలుసుకుందాం.
పంచభక్ష్య పరమాన్నాలతో నిండుగా ఉన్న ఆకు ఎగిరెగిరి పడకుండా, నిశ్చలంగా ఉంటుంది. అదే వంటకాలేవీ వడ్డించని ఆకు ఎగెరెగిరి పడుతుంటుందని ఈ సామెత యొక్క భావం.
అంటే... బాగా చదువుకుని జ్ఞానాన్ని సంపాదించిన వారికి, తమకి ఏది తెలియదో బాగా తెలుసు. అందుకే మీకేమండీ గొప్పవాళ్లు, మీకు తెలియనిదంటూ ఏదీ లేదని అన్నారంటే... వాళ్లు వినయంగా, ఈ ప్రపంచంలో ఏ ఒక్కడూ గొప్పవాడు కాడండి... మనకంటే గొప్పవాళ్లు ఎప్పుడూ ఉంటారని మృదువుగా చెబుతారు. అదే మిడిమిడి జ్ఞానం ఉన్నవాళ్లు తమని మించినవాళ్ళు లేరని విర్రవీగుతారు.
జ్ఞానాన్ని పెంచుకోవడంలో ఎదిగేకొద్దీ, ప్రవర్తనలో ఒదిగి ఉంటారని... ఈ సామెతలోని అంతరార్థం. దీని భావాన్ని గ్రహించి మీరు జాగ్రత్తగా మెలగుతారు కదూ.. పిల్లలూ...!
