రవికి తదుపరి వచ్చు గ్రహం చంద్రుడు. ఒకటవ సంఖ్య తదుపరి సంఖ్య 2. దీనికి అధిపతి చంద్రుడు. 2, 11, 19,20 తేదీలలో జన్మించినవారు సోమవారం, రోహిణి, హస్త, శ్రవణం నక్షత్రంనందు జన్మించినవారు కూడా రెండో సంఖ్యవారవుతారు. వీరు మంచి ఆకారం కలవారుగానూ... ఆకర్షణీయమైన కనులు, పుష్టికరమైన శరీరం, మంచి ఛాయగలవారుగానూ ఉంటారు. వారి తీరు ఎదుటివారిని ఆకర్షించు స్వభావం గలవారు, సున్నితమైన మనస్కులుగలవారై ఉంటారు. వీరి అభిప్రాయములు వీరి ముఖమునందు స్పష్టంగా గోచరిస్తాయి.
అందరికీ మంచి చేయు గుణం కలవారు. మంచి విద్య, జ్ఞానం, ఎదుటివారి కష్టములను చూసి వెంటనే సహాయం చేయువారుగా ఉంటారు. ఎదుటివారిని బాధించే స్వభావం లేనివారు. రచనా రంగంలో మంచి జ్ఞానం గలవారు. జీవితంలో ఊహించని అభివృద్ధికి ఆస్కారం కలవారు. నిదానమే ప్రధానం సూత్రాన్ని అనుసరించేవారు. ప్రతి విషయంలోను త్వరపడి నిర్ణయం తీసుకోనివారై ఉంటారు. ఆధ్యాత్మిక చింతన కలవారు. ప్రతి పనీ తేలికగా నెరవేర్చుకొను స్వభావం కలవారు. మంచి బుద్ధిమంతులు.
ప్రకృతిని ఆరాధించేవారు, ప్రశాంత జీవనాన్ని కోరుకునేవారు. తమ సమస్యలు ఎదుటివారికి తెలియకుండా జాగ్రత్తగా పరిష్కరించుకొనువారు. ఏ విషయంలోనైనా ఏకాగ్రతతో పని నెరవేర్చుకొనువారు, ఏదైనా తమ తప్పు తెలుసుకుని వెంటనే సరిదిద్దుకునేవారు. వీరికి అసలు కోపమనేది రాదు. ఉన్నట్లుండి జీవితంపై విరక్తి స్వభావం కలవారు, చంచలత్వం సామాన్యముగా ఉండువారు, స్వతంత్ర జీవితముపైగానీ, ఎవరి వద్ద అయినా పని తలపెట్టినా ఆ పని పూర్తి అయ్యే వరకూ విశ్రాంతి తీసుకోకుండా పనిని ముగించుకునేవారు. ప్రతి చిన్న విషయంలోనూ అధికమైన భయాన్ని కలిగి ఉండేవారు. తమ జీవిత విషయాలను దాచుకోలేనివారై ఉంటారు. వీరు అతి శుభ్రవంతులు.
