దీపావళి అంటే దీపోత్సవం. ఈ దివ్వెల పండుగ రోజున సర్వశుభాలు, సంపదలు ప్రసాదించే లక్ష్మీదేవిని పూజించడం అనాదిగా వస్తున్న సాంప్రదాయం. ఆ రోజు దీపలక్ష్మి తన కిరణాలతో అమావాస్య చీకట్లను పాలద్రోలి జగత్తును తేజోవంతం చేస్తుందని ఆనవాయితీ.
"తైలే లక్ష్మీర్జలే గంగా దీపావళి తిథౌవసేత్!
అలక్ష్మీ పరిహారార్థం తైలాభ్యంగో విధీయతే!."
దీపావళినాడు నువ్వుల నూనెలో లక్ష్మీదేవి, నదులు, బావులు, చెరువులు మొదలైన నీటి వనరులలో గంగాదేవి సూక్ష్మ రూపంలో నిండి వుంటారని శాస్త్రాలు చెబుతున్నాయి. అందుచేత ఆ రోజున నువ్వుల నూనెతో తలంటుకుని సూర్యోదయానికి ముందు నాలుగు ఘడియల పాటు అరుణోదయ కాలంలో అభ్యంగన స్నానం తప్పకుండా చేస్తే సకల సంపదలు చేకూరుతాయని పండితుల విశ్వాసం.
ఇలా చేయడం వల్ల దారిద్ర్యం తొలగిపోతుందని, దీపావళి రోజున గంగానదీ స్నాన ఫలం సకల మోక్షాలకు, ఐష్టైశ్వర్యాలను ప్రసాదించడంతో పాటు నరక భయాన్ని తొలగిస్తుందని శాస్త్రాలు పేర్కొంటున్నాయి.
అదే విధంగా అమావాస్యనాడు స్వర్గస్థులైన పితృదేవరులకు తర్పణం విడవడం విధి కనుక... ఆ రోజున పురుషులు తైలాభ్యంగన స్నానం చేసి "యమాయ తర్పయామి, తర్పయామి తర్పయామి" అంటూ మూడుసార్లు దోసెట్లో నీరు విడిచిపెట్టడం వల్ల పితృదేవతలు సంతృప్తి చెంది ఆశీర్వదిస్తారని పురాణాలు వెల్లడిస్తున్నాయి.
ఇకపోతే... దీపావళి నాడు స్త్రీలు అభ్యంగన స్నానానంతరం కొత్త బట్టలు ధరించి, గృహానికి ముందు రంగురంగుల ముగ్గులు వేసి, గుమ్మాలను పసుపు, కుంకుమలతో అలంకరించి, మామిడాకు తోరణాలు కట్టి సాయంత్రం లక్ష్మీపూజ చేస్తే సకల సంపదలు చేకూరుతాయని విశ్వాసం.
లక్ష్మీపూజకు పిండివంటలను నైవేద్యంగా సమర్పించి, మట్టి ప్రమిదలలో నువ్వుల నూనె పోసి పూజాగృహంలో, ఇంటి బయట దీప తోరణాలు అమర్చడం ద్వారా ఆ గృహం సిరిసంపదలతో వెల్లివిరుస్తుందని పండితులు పేర్కొంటున్నారు.
