ఐదు టెస్టుల సిరీస్‌లో భాగంగా రెండో ప్రాక్టీస్ మ్యాచ్‌లో కూడా భారత బౌలర్లు తేలిపోయారు. మన బౌలర్లను ఇంగ్లండ్ బ్యాట్స్‌మెన్ ఆటాడుకున్నారు. లీసెస్టర్ షైర్ తో జరిగిన తొలి ప్రాక్టీసు మ్యాచ్‌లో భారీదా పరుగులు సమర్పించుకున్న భారత బౌలర్లు తాజాగా డెర్బీషైర్ జట్టుతో జరిగిన మ్యాచ్‌లోనూ భారీగా పరుగులు సమర్పించుకున్నారు.
భారత బౌలింగ్‌ను తుత్తునియలు చేస్తూ డెర్బీ బ్యాట్స్‌మెన్ ఒక్కరోజులోనే 326 (5 వికెట్లకు) పరుగులు చేశారు. డర్స్ టన్ 95, గాడిల్ మాన్ 67 (నాటౌట్), స్లేటర్ 54, హోసీన్ 53 (నాటౌట్) టీమిండియా బౌలర్లను ఆటాడుకున్నారు. జట్టులో అనుభవజ్ఞుడైన బౌలర్ ఇషాంత్ శర్మ ఒక్క వికెట్టూ తీయలేక ఉసూరుమనిపించాడు. పార్ట్ టైమ్ బౌలర్ రవీంద్ర జడేజా రెండు వికెట్లు తీసి పరువు నిలిపాడు.
