మాజీ కెప్టెన్ మహేంద్ర సింగ్ ధోనీ కూల్ కెప్టెన్ అని పేరు తెచ్చుకున్నాడు. తన కూల్ నెస్‌కు కారణం ఏంటనే విషయాన్ని ధోనీ వివరించాడు. తాను కూడా మానవ మాత్రుడ్నే అని, అయితే మైదానంలో ఉన్నప్పుడు తన భావోద్వేగాలను అణచుకుంటానని చెప్పాడు.
మైదానంలోకి దిగిన తర్వాత ఎవరూ తప్పులు చేయాలని కోరుకోరని, మిస్ ఫీల్డింగ్ కానివ్వండి, క్యాచ్ వదిలేయడం కానివ్వండి... ఎవరూ కావాలని చేయరని ధోనీ పేర్కొన్నాడు.
మైదానంలో ఎవరైనా ఫీల్డింగ్‌లో బంతిని వదిలేసినా, క్యాచ్ డ్రాప్ చేసినా, అలా ఎందుకు చేశారని వారి కోణంలోంచి ఆలోచిస్తానని ధోనీ తెలిపాడు. మైదానంలో 40వేల మంది, ప్రపంచ వ్యాప్తంగా ఇంకెంతో మంది మ్యాచ్‌ను తిలకిస్తుంటారని తెలిపాడు.
ఓ ఆటగాడు 100 శాతం అంకితభావంతో ఆడుతూ ఓ క్యాచ్ వదిలేస్తే, అదేమంత సమస్యగా తాను భావించనని ధోనీ స్పష్టం చేశాడు. ప్రాక్టీసులో అతడెన్ని క్యాచ్‌లు పట్టాడన్నది ఆలోచిస్తానని, క్యాచింగ్‌లో ఏదైనా సమస్య ఉంటే దాన్ని అధిగమించడానికి అతడు ప్రయత్నం చేశాడా లేదా అనేది గమనిస్తానని వివరించాడు. వదిలిన క్యాచ్ గురించి కాకుండా, తాను ఇలాంటి విషయాలను ఆలోచిస్తానని తెలిపాడు.
దేశానికి ప్రాతినిధ్యం వహించే సమయంలో పొరపాట్లు బాధ కలిగిస్తాయని, కానీ ఆ సమయంలో మన భావోద్వేగాలను అదుపు చేసుకోవాల్సిన అవసరం ఉందని ధోనీ అభిప్రాయపడ్డాడు.
