కొందరు చిన్నారులు నలుగురిలో మాట్లాడాలన్నా ఆడుకోవాలన్నా ఇబ్బందిపడుతుంటారు. అలాంటి పిల్లలతో ఎలా ఉండాలంటే..
* చాలామంది పిల్లలు ఏదైనా పని అప్పచెబితే నాకు రాదు. నేను చేయలేను అంటుంటారు. ఆ పని తాము సరిగ్గా చేయలేనేమో అనే భయం ఇందుకు కారణం కావచ్చు. అలాంటివాళ్లకి ఎవరూ ఏ పనిలోనూ పరిపూర్ణత సాధించలేరని చెప్పాలి. నేర్చుకునే కొద్దీ కొత్త విషయాలు తెలుస్తాయనాలి.
* ఇతరులతో పోల్చుకుని ఇబ్బంది పడుతున్నారా? లోకంలో ఏ ఇద్దరూ ఒకేలా ఉండలేరని వివరించండి. మనలోని ప్రత్యేకత ఏమిటో గుర్తించి కష్టపడితే ఉన్నతంగా ఎదగొచ్చని విజేతల జీవిత కథలతో సోదాహరణంగా చెప్పండి.
* అభిరుచులు, ఆసక్తులు తెలుసుకుని అవసరమైతే శిక్షణ ఇప్పించండి. ఇది వారిలో ఆత్మవిశ్వాసాన్ని పెంచుతుంది.
* తల్లిగా మీ పాప ఏం తినాలి? ఏం తాగాలి? అన్న దగ్గర్నుంచి ప్రతీదీ మీరే దగ్గరుండి చేయడం సరికాదు. వారే. ఎంచుకునే అవకాశం ఇవ్వండి.
* ఇంటిపనుల్లో చిన్నపాటి బాధ్యతలూ అప్పగించండి. అప్పుడే వారికి కష్టనష్టాలు అర్థమవుతాయి. లేదంటే చిన్న సమస్యకే కుంగిపోతుంటారు. ఆత్మన్యూనతకు లోనవుతుంటారు.
