మెదడు ఎన్ని విషయాలనైనా గుర్తు పెట్టుకోగలదా..?
* మెదడు కంప్యూటర్‌లోని హార్డ్ డిస్క్ లాంటిదే. ఎందుకంటే.. హార్డ్ డిస్క్‌లో ఎంత సమాచారాన్నయినా ఎంచక్కా దాచుకోవచ్చు. అలాగే మెదడులోకూడా. ఫలానా విషయాన్ని గుర్తుంచుకోవాలని కోరుకోకపోతే, అది పరిశీలనకు అందటంగానీ, గుర్తుండటంగానీ కష్టం. కాబట్టి ఆసక్తిగా గుర్తుంచుకునేలా చదవటం చాలా ముఖ్యమైన విషయం.* సాధనవల్లనే ఏ అలవాటయినా ఖచ్చితంగా అలవడుతుంది. ఏ పని అయితే చేస్తున్నారో దానిపైనే దృష్టి కేంద్రీకరించటం అలవాటు చేసుకోవాలి. అప్పుడు చదువు విషయంలో కూడా అది తేలిక అవుతుంది. సాధారణంగా మెదడుకు ప్రశ్నలు వెళితే దానికి సమాధానం తెలుసుకోవాలని తీవ్రంగా ప్రయత్నిస్తుంది.* చదువుకుంటున్నప్పుడు ఆ దారిలో ఏదైనా శబ్దం వినిపిస్తే.. అది ఏ పెళ్లిదో, దేవుడి ఊరేగింపుదో, అసలు ఏంటో.. అనే ప్రశ్నలు తెలియకుండానే మెదడుకు చేరుతాయి. దాంతో అది దానికి సమాధానాలు తెలుసుకునేందుకు ఉవ్విళ్లూరుతుంది. అలాంటప్పుడు ఆటోమేటిగ్గా ఏకాగ్రత చెదిరిపోతుంది. అందుకే చదువుకునేటప్పుడు చుట్టుప్రక్కల వాతావరణం ప్రశాంతంగా ఉండాలి.* ఏకాగ్రత చెదిరిపోకుండా ఉండాలంటే.. మెదడును ఎప్పటికప్పుడు చదువు, ఆయా సబ్జెక్టులకు సంబంధించిన ప్రశ్నలతో నింపేయాల్సిందే. ఒక లక్ష్యాన్ని నిర్ణయించుకుని మెదడుకు సంకేతాలు అందిస్తే.. అది దాన్ని చేరుకునేందుకు శాయశక్తులా సిద్ధం చేస్తుంది. అందుకనే పిల్లలూ.. ఒక నిర్దిష్ట లక్ష్యం లేకుండా చదవవద్దు.
