న్యాయ విద్యకు మంచి రోజులు వస్తున్నాయి. ఇప్పటి వరకు లా కోర్సుల్లో అప్పుడే విద్యను పూర్తి చేసుకున్న విద్యార్థులతో సహా 60 యేళ్ళు నిండి పదవీ విరమణ చేసిన వయోవృద్దులు కలిసి చదువుకునే అవకాశం ఉండేది. ఈ పద్దతికి ఈ విద్యాసంవత్సరం నుంచి ఉన్నత విద్యామండలి స్వస్తి చెప్పింది. మూడు, ఐదేళ్ల లా కోర్సులో చేరడానికి వయోపరిమితి విధించింది.
ఈ విద్యాసంవత్సరం న్యాయ కోర్సులో ప్రవేశం పొందాలంటే మూడేళ్ల కోర్సుకు గరిష్ట వయోపరిమితి 30 సంవత్సరాలు. బీసీ, ఎస్సీ, ఎస్టీ, పీహెచ్ విద్యార్థులకు మాత్రం ఐదేళ్ళ వరకు సడలింపు ఉంటుంది.
అలాగే, ఐదేళ్ళ లా కోర్సులో చేరడానికైతే గరిష్ట వయోపరిమితిని 20 సంవత్సరాలుగా నిర్ణయించారు. బిసీ, ఎస్సీ, ఎస్టీ విద్యార్థులకు కేవలం రెండేళ్లు మాత్రమే సడలింపు ఇచ్చారు. అంటే 22 ఏళ్లుదాటితే ఐదేళ్ల లా కోర్సులో చేరడానికి ఏ సామాజిక వర్గానికి చెందిన వారైనా అనర్హులు, 35 సంవత్సరాల వయస్సు దాటితే మూడేళ్ల లాకోర్సులో ప్రవేశం లేదు.
అందువల్ల వచ్చే మూడేళ్ల తర్వాత యువ న్యాయవాదులు పెరిగే అవకాశం ఉంది. న్యాయశాస్త్రం చదవాలంటే కనీస విద్యార్హతతోపాటు వయోపరిమితి విధించింది. ఏ విద్యార్హత లేకున్నప్పటికీ ఓపెన్‌ వర్సిటీ ద్వారా డిగ్రీ పూర్తి చేసిన వారు కూడా మూడేళ్ల లా కోర్సులో ఎంట్రెన్స్ రాసి సీటు పొందే అవకాశం ఉండేది.
ఈ విధానాన్ని కూడా ఈ విద్యాసంవత్సరం తొలగించారు. న్యాయశాస్త్రంలో పట్టభద్రులు కావాలంటే సంప్రదాయ విద్య (10+2+3) చదివి తీరాల్సిందే. అంతేకాకుండా డిగ్రీ సింగిల్‌ సిట్టింగ్‌లో పూర్తిచేసిన వారు న్యాయశాస్త్రం చదవడానికి అనర్హులు.
