అనిల్ అంబానీ గ్రూపుకు చెందిన అనుబంధ సంస్థ రిలయన్స్ బ్రాడ్‌కాస్ట్‌ నెట్‌వర్క్స్‌ దేశంలోనే తొలిసారిగా ఇంటర్నెట్ రేడియోను ప్రారంభించింది. ఈ ఇంటర్నెట్ రేడియోను సంస్థ చైర్మన్‌ అనిల్ అంబానీ ప్రారంభించారు.
రేడియో రంగంలో అగ్రస్థానంలో నిలిచేందుకు గానూ.. సరికొత్త వ్యూహంతో ప్రాజెక్టును ప్రారంభించామని కంపెనీ హెడ్‌ (రేడియో, డిజిటల్‌) సౌమెన్‌ జి. చౌదరి అన్నారు. ప్రస్తుతం దేశంలో 5 కోట్ల మంది అంతర్జాల (ఇంటర్నెట్) వినియోగదారులు ఉన్నారని, ఇందులో 18 నుంచి 30 ఏళ్ల వయస్సు గలవారే ఎక్కువగా ఉన్నట్లు ఆయన తెలిపారు.
ఇంటర్నెట్ రంగంలో ఉన్న ఈ అవకాశాన్ని అందిపుచ్చుకునేందుకే.. ఇంటర్నెట్ రేడియోను ప్రారంభించామని చౌదరి అన్నారు. దీని ద్వారా ఆన్‌లైన్‌ ప్రకటనలకు (అడ్వటైజింగ్‌) ఆదరణ మరింత పెరుగుతోందని, 2013 నాటికి తమ సంస్థ ఆదాయం 32 శాతం వృద్ధితో రూ. 2,000 కోట్లకు చేరుకుంటుందని ఆయన అంచనా వేశారు.
