ఈ నెల 15 వ తేదీ నుంచి జూన్‌ 14 వ తేదీ వరకు మొత్తం 61 రోజులపాటు దేశవ్యాప్తంగా సముద్ర జలాల్లో సముద్ర ఉత్పత్తుల వేటను పూర్తిగా నిషేధించనున్నారు. చేపలు, రొయ్యలు, ఇతర సముద్ర ఉత్పత్తుల వేటను నిషేధిస్తున్నట్లు ఏపీ మత్స్యశాఖ అధికారికంగా ఉత్తర్వులు జారీ చేసింది. ప్రస్తుత 2020-21 సీజన్‌ ఈనెల 15 వ తేదీతో ముగియనుంది.
మత్స్యశాఖ ఇన్‌ఛార్జి జెడి పి.లక్ష్మణరావు మాట్లాడుతూ.. ఎపి మెరైన్‌ ఫిషింగ్‌ (రెగ్యులైజేషన్‌) చట్టం 1994 ప్రకారం.. నిషేధాజ్ఞలను అమలు చేస్తున్నామన్నారు. మత్స్యరాశుల సమర్థ యాజమాన్య చర్యల్లో భాగంగా.. ఈ నిషేధాన్ని అమలు చేస్తున్నామన్నారు.
నిషేధ సమయంలో ఎవరైనా సముద్రంలో వేట సాగిస్తే చట్టపరంగా చర్యలు తీసుకుంటామని, బోట్లు, మత్స్య ఉత్పత్తులను సైతం సీజ్‌ చేస్తామని హెచ్చరించారు. ఈ నిషేధ ఆంక్షలను రాష్ట్ర మత్స్యశాఖ అధికారులు పర్యవేక్షించనున్నారు.
నిషేధిత సమయంలో చిరుచేపలు, రొయ్యల ఉత్పత్తి పెద్ద ఎత్తున జరగనుంది. 61 రోజులపాటు మత్స్యవేటను నిలిపివేస్తే తరువాత దిగుబడులు ఆశాజనకంగా ఉంటాయని మత్స్యశాఖ అధికారులు పేర్కొన్నారు.
