మంచి చేసి మోస పోయిన ఎమ్మెల్యే తాలుకా
పాకాలలో పుష్ప 2 పోస్టర్లు
టీడీపీ వర్సెస్ వైకాపా
Pushpa 2 TDP Vs YCP: అల్లు అర్జున్ పుష్ప 2 భారీ అంచనాల మధ్య విడుదలైంది. ఇదిలా ఉంటే, మెగా ఫ్యామిలీతో అల్లు అర్జున్‌కి ఉన్న విభేదాల కారణంగా ఈ చిత్రం కూడా వివాదంలో పడింది. మెగా కాంపౌండ్‌లో ఎదిగి, చిరంజీవి గారి సపోర్ట్‌తో స్టార్‌డమ్‌కి ఎదిగినా, మెగా ఫ్యామిలీని అల్లు అర్జున్ గౌరవించడం లేదని ఒక జనసేన నాయకుడు సినిమాని బ్యాన్ చేస్తానని బెదిరించాడు.
తాజాగా ఈ రోజు తిరుపతి జిల్లా పాకాలలో పుష్ప 2 సినిమా ప్రదర్శింపబడుతున్న థియేటర్ వద్ద టీడీపీ, వైసీపీ నేతల మధ్య వాగ్వాదం చోటుచేసుకుంది. వివరాల్లోకి వెళితే, పాకాలలోని శ్రీ రామకృష్ణ థియేటర్ వద్ద అల్లు అర్జున్‌కు మద్దతుగా వైసీపీ నేతలు ఫ్లెక్సీలు ఏర్పాటు చేశారు. అల్లు అర్జున్‌తో పాటు వైసీపీ అధినేత వైఎస్‌ జగన్‌ మోహన్‌రెడ్డి, మాజీ ఎమ్మెల్యే చెవిరెడ్డి భాస్కర్‌ రెడ్డిల ఫ్లెక్సీలు ఉన్నాయి.
చెవిరెడ్డి భాస్కర్‌రెడ్డిని ఉద్దేశించి "మంచి చేసి మోస పోయిన ఎమ్మెల్యే తాలుకా" అనే ట్యాగ్‌లైన్‌ని కూడా ఫ్లెక్సీల్లో పెట్టారు. "పిఠాపురం ఎమ్మెల్యే గారి తాలూకా" అనే ట్యాగ్‌లైన్‌ని జనసేన నాయకుల పాపులర్ ట్యాగ్‌లైన్ నుండి తీసుకున్నారు. థియేటర్ వద్ద ఈ తరహా ఫ్లెక్సీలు వేయడంపై స్థానిక టీడీపీ నేతలు అభ్యంతరం వ్యక్తం చేశారు.
ఈ వాగ్వాదం భౌతిక దాడులకు దారితీసింది. వైసీపీ నేతలు రాళ్లు, కర్రలు, వేడినీళ్లతో దాడి చేశారు. టీడీపీ నేతలు కూడా దాడికి పాల్పడంతో పెద్ద గొడవకు దారితీసింది. దీంతో థియేటర్ వద్ద ఉద్రిక్త వాతావరణం నెలకొనగా, పోలీసులు రంగప్రవేశం చేసి పరిస్థితిని అదుపులోకి తెచ్చారు.
