ఏపీ ప్రభుత్వ ప్రధాన సలహాదారు సజ్జల రామకృష్ణారెడ్డికి వైకాపాకు చెందిన నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి గట్టివార్నింగ్ ఇచ్చారు. గుర్తుపెట్టుకో.. సజ్జలా.. నాకు ఆడియో కాల్స్ వస్తే.. నీకు వీడియో కాల్స్ వస్తాయి అంటూ హెచ్చరించారు. అయితే, ఎన్ని బెదిరింపు కాల్స్ వచ్చినా భయపడే ప్రసక్తేలేదని స్పష్టం చేశారు. సజ్జల కోటరీ నుంచి బెదిరింపు కాల్స్ వస్తున్నాయని, నెల్లూరు సిటీ ఎమ్మెల్యే అనిల్ కుమార్ రెడ్డి కూడా ఫోన్ చేసి బెదిరించారని కోటంరెడ్డి ఆరోపించారు. అవసరమైతే తనపై హత్యాయత్నం కేసు కూడా పెట్టుకోవచ్చని కోటంరెడ్డి సూచించారు.
పార్టీకి చెందిన 13 మంది మంత్రులు, సలహాదారులు, ప్రాంతీయ కోఆర్డినేట్రలు తన వ్యక్తిత్వాన్ని అనుమానించే రీతిలో మాట్లాడుతుంటే తప్పని పరిస్థితుల్లో మాట్లాడాల్సి వస్తుందని రెండు రోజుల క్రితం ఏర్పాటు చేసిన విలేకరుల సమావేశంలో ఆయన వెల్లడించారు.
అంతేకాకుండా, వైకాప నేతలు తన ఫోన్ ట్యాప్ చేస్తున్నారని ఆరోపించిన కోటంరెడ్డి శ్రీధర్ రెడ్డి.. దీనికి సంబంధించిన ఆధారాలను కూడా బయటపెడతానని అన్నారు. ఈ క్రమంలో ఆయన భద్రతను కూడా పోలీసులు కుదిపించారు. ఇది రాష్ట్ర వ్యాప్తంగా మరోమారు చర్చనీయాంశమైంది.
