విశాఖలో అసైన్డ్ భూముల క్రమబద్ధీకరణ ముసుగులో జరిగిన భూ-కుంభకోణానికి సంబంధించి పత్రికల్లో విస్తృతంగా వార్తలు రావడంపై టీడీపీ అధినేత చంద్రబాబు ఆరా తీశారు. అసైన్డ్ భూముల క్రమబద్ధీకరణ పేరుతో విశాఖ పరిసర ప్రాంతాల్లో భారీ కుంభకోణం జరిగిందని విశాఖ టీడీపీ నేతలు చంద్రబాబుకు సమాచారం అందించారు.
విశాఖపట్నంలో అసలైన ఇన్‌సైడర్‌ ట్రేడింగ్‌ జరిగిందని, అసైన్డ్ భూముల క్రమబద్ధీకరణపై అధికార పార్టీ నేతలు, కొందరు ఉన్నతాధికారులకు ముందస్తు అవగాహన ఉందని వివరించారు. పేద రైతుల నుంచి ప్రభావవంతమైన వ్యక్తుల చేతుల్లోకి కనీసం 2 వేల ఎకరాలు బదలాయించబడ్డాయని, లబ్ధిదారుల్లో ప్రభుత్వ ప్రధాన కార్యదర్శి జవహర్‌రెడ్డి కూడా ఉన్నారని పేర్కొన్నారు.
ఈ కుంభకోణం మొదటి నుంచి చివరి వరకు ఎలా బయటపడిందో మాజీ ఎమ్మెల్యేలు నల్లమిల్లి రామకృష్ణారెడ్డి, జ్యోతుల నెహ్రూ వివరించారు. ఇంత దారుణంగా భూ ఆక్రమణలు జరగడం తానెప్పుడూ చూడలేదని ఈ సందర్భంగా చంద్రబాబు వ్యాఖ్యానించారు.
రాజధాని ప్రాంత రైతులు ఎదుర్కొంటున్న సమస్యలను మాజీ ఎమ్మెల్యే శ్రవణ్ కుమార్ వివరించారు. రైతులకు పార్టీ సంపూర్ణ మద్దతు ఉంటుందని, టీడీపీ అధికారంలోకి వస్తే రాజధాని నిర్మాణాన్ని వేగవంతం చేస్తామని చంద్రబాబు హామీ ఇచ్చారు. ఈ సందర్భంగా రాష్ట్రవ్యాప్తంగా ఓట్ల లెక్కింపు ఏర్పాట్లు, అధికారులు, పోలీసుల తీరుపై కూడా చర్చ జరిగినట్లు సమాచారం.
