సోషల్ మీడియా సమస్యల కోసం ప్రత్యేక చట్టం చేయాలనే అంశంపై వేగంగా స్పందించినందుకు సీఎం చంద్రబాబు, డిప్యూటీ సీఎం పవన్ కల్యాణ్‌లకు ధన్యవాదాలు అని హోం మంత్రి అనిత అన్నారు. కొందరు తనను లక్ష్యంగా చేసుకొని పోస్టులు పెడుతున్నారని అనిత గుర్తుచేశారు. అలాంటి వారిపై కఠిన చర్యలు తీసుకుంటామని స్పష్టం చేశారు. సోషల్ మీడియా వేదికగా వ్యక్తిత్వ హననానికి పాల్పడుతున్నారని మండిపడ్డారు.
సోషల్ మీడియా పోస్టులపై అనిత స్పందిస్తూ.. "ఆ పోస్టులు చూసి బాధేసింది. కానీ నేను గట్టిదాన్ని. అందుకే చలించలేదు. పోస్టులు చేస్తోన్న వెదవలను ఊరికే వదిలే ప్రసక్తే లేదు. కొందరు సోషల్ మీడియాను అస్త్రంగా వాడుతున్నారు. ఉగ్రవాదుల కన్నా దారుణంగా ప్రవర్తిస్తున్నారు. అలాంటి వారిని ఊరికే వదిలే ప్రసక్తే లేదు. చట్టం ముందు నిలబెడతాం" అని హోం మంత్రి అనిత స్పష్టం చేశారు. వైసీపీ అధినేత వైఎస్ జగన్‌పై అనిత తీవ్రస్థాయిలో విరుచుకుపడ్డారు. జగన్ నోటి వెంట వినకూడని మాటలు వస్తున్నాయని మండిపడ్డారు.
"చీకటి రోజులు అంటే ఏంటో తెలుసా జగన్ రెడ్డి? మా అక్కని ఏడిపిస్తున్నారు అంటే, ఒక చిన్న కుర్రాడిని తగలబెట్టేసారు చూడు. అవి చీకటి రోజులు అంటే. కనీసం ఒక ఎంక్వయిరీ చేసావా జగన్" అంటూ అనిత ఫైర్ అయ్యారు.
"ఎవరైనా తన చెల్లి, తల్లి జోలికి వస్తే లాగిపెట్టి కోడతారు. అలాంటిది షర్మిలమ్మ రాజశేఖర రెడ్డికి పుట్టలేదు అని నీ సోషల్ మీడియా వాళ్ళు పోస్ట్‌లు పెట్టినా కూడా జగన్‌కి పౌరుషం రాలేదా?" అంటూ అనిత వెల్లడించారు. కొన్ని కుక్కలు ఇష్టమొచ్చినట్లు పోస్టులు పెడితే చేతులు కట్టుకుని కూర్చోవాలా..? అంటూ ప్రశ్నాస్త్రాలు సంధించారు.
