టాలీవుడ్ హీరోల‌కు ఒక్కొక్క‌రూ యాక్సిడెంట్ల పాల‌వుతున్నారు. ఇటీవ‌ల స్పోర్ట్స్ బైక్ యాక్సిడెంట్ లో హీరో సాయి ధ‌ర‌మ్ తేజ్ గాయ‌ప‌డిన సంఘ‌ట‌న నుంచి ఇంకా కోలుకోక‌ముందే తెలుగు సినీ ప‌రిశ్ర‌మ‌లో మ‌రో హీరో గాయ‌ప‌డ్డాడు. యువ న‌టుడిగా తనదైన ప్రత్యేక శైలితో ఆడియన్స్ ను ఆకట్టుకొని, తనకంటూ ప్రత్యేక గుర్తింపు తెచ్చుకున్న నటుడు హీరో రామ్ పోతీనేని గాయ‌ప‌డ్డాడు. ఎనర్జిటిక్ హీరో రామ్ నటిస్తున్న 19 సినిమా 'రాపో19' షూటింగ్ జరుగుతున్న విషయం తెలిసిందే. ఈ సినిమాకి తమిళ డైరెక్టర్ లింగుస్వామి దర్శకత్వం వహిస్తుండ‌గా, రామ్ ఫిజిక్ కోసం విప‌రీతంగా వ‌ర్క్ అవుట్స్ చేస్తున్నాడు. ఆయ‌న జిమ్ వ‌ర్క‌వుట్ చేస్తుండ‌గా, ఒక్క‌సారిగా గాయ‌ప‌డ్డాడ‌ట. దీనితో ఆయ‌న త‌ల, మెడ న‌రాలు బెణికాయ‌ట. దీనితో రామ్ ఆసుప‌త్రి పాల‌వ‌గా, మెడ‌కు చికిత్స చేసి, మెరుగు అయ్యే వ‌ర‌కు షూటింగులు అన్నీ కాన్సిల్ అయిపోయాయ‌ట.
టైటిల్ ఫిక్స్ కానీ ఈ సినిమాను రామ్ అభిమానులు 'రాపో19' గా పిలుస్తున్నారు. రాపో19 సినిమాలో రామ్ సరసన ఉప్పెన ఫేమ్ 'కృతి శెట్టి హీరోయిన్'గా నటిస్తోంది. ఈ సినిమాలో కోలీవుడ్ స్టార్ హీరో ఆర్య విలన్ గా నటిస్తున్నాడు. ఈ షూటింగ్ ముమ్మ‌రంగా సాగుతుండ‌గా, ఇపుడు రామ్ జిమ్ చేస్తూ గాయ‌ప‌డ‌టం ప‌రిశ్ర‌మ వ‌ర్గాల‌ను క‌ల‌వ‌ర‌ప‌రుస్తున్నాయి. రామ్ కు గాయం కావడంతో సినిమా షూటింగు నిలిపివేశారు.
