స్కిల్ డెవలప్‌మెంట్ స్కామ్ కేసులో అరెస్టయి జ్యూడీషియల్ రిమాండ్‌లో ఉన్న తెలుగుదేశం పార్టీ అధినేత నారా చంద్రబాబు నాయుడు కుడికంటికి తక్షణ క్యాటరాక్ట్ ఆపరేషన్ చేయాలని రాజమండ్రి ప్రభుత్వ ఆస్పత్రి వైద్య నిపుణులు నిర్ధారించారు.
ప్రభుత్వ ఆసుపత్రి సివిల్ సర్జన్ స్పెషలిస్ట్ బి.శ్రీనివాసరావు ఈ నెల 25వ తేదీన చంద్రబాబుని పరీక్షించి, జైలు అధికారులకు నివేదిక ఇచ్చారు. అందులో చంద్రబాబు కుడికంటిలో ఇమ్మెచ్యూర్ క్యాటరాక్ట్ ఉందని, దానికి శస్త్రచికిత్స చేయాలని నివేదించారు. చంద్రబాబుకు దృష్టి సమస్యను సరిదిద్దేందుకు కుడికంటికి క్యాటరాక్ట్ శస్త్రచికిత్స చేయాలని హైదరాబాద్ నగరంలోని ఎల్వీ ప్రసాద్ ఐ ఇనిస్టిట్యూట్ వైద్యులూ ఇటీవల ఇచ్చిన నివేదికలో స్పష్టంచేశారు.
ఈ వైద్యులే చంద్రబాబుకు 2016లో 'యాంగిల్ క్లోజర్ గ్లకోమా అనే కంటి సమస్యకు లేజర్ చికిత్స, ఈ ఏడాది జూన్ 21న ఎడమ కంటికి క్యాటరాక్ట్ శస్త్రచికిత్స చేశారు. ఆ తర్వాత ఎడమ, కుడి కంటి చూపుల్లో వ్యత్యాసం ఎక్కువగా ఉన్నందున మూడు నెలల్లోగా కుడికంటికీ శస్త్రచికిత్స చేయాలని అప్పుడే తెలిపారు. ఇటీవల ఇచ్చిన నివేదికలోనూ వారు అదే విషయాన్ని మళ్లీ ధ్రువీకరించారు. అయితే, జైలులో చంద్రబాబు ఉండటం, ఆయన ఆరోగ్యం పట్ల ఏపీ ప్రభుత్వం నిర్లక్ష్యంగా వ్యవహరిస్తుండటంతో బాబు ఆరోగ్యంపై సర్వత్రా ఆందోళన వ్యక్తమవుతుంది.
