రాష్ట్రవ్యాప్తంగా ఆర్టిఫిషియల్ ఇంటెలిజెన్స్(ఏఐ) విస్తరణ, స్వీకరణను వేగవంతం చేయడానికి ఆంధ్రప్రదేశ్ ప్రభుత్వంతో గూగుల్ ఈరోజు వ్యూహాత్మక భాగస్వామ్యాన్ని చేసుకున్నట్లు ప్రకటించింది. ఈ భాగస్వామ్యం అధికారికంగా చేసుకున్న అవగాహన ఒప్పందం(ఎంఓయు) ద్వారా రూపొందించబడింది. ఏఐ పరిష్కారాల అభివృద్ధి, అమలును ఈ భాగస్వామ్యం నడిపిస్తుంది, ఆరోగ్య సంరక్షణ మరియు పర్యావరణ స్థిరత్వం వంటి కీలక రంగాలపై ఇది దృష్టి సారిస్తుంది, అదే సమయంలో డిజిటల్ మౌలిక సదుపాయాల మెరుగుదలలు, ఏఐ నైపుణ్యాల అభివృద్ధి మరియు స్థానిక స్టార్టప్ పర్యావరణ వ్యవస్థకు మద్దతు ఇస్తుంది.
ఈ ఎంఒయు మార్పిడి అమరావతిలో, ఆంధ్రప్రదేశ్ ఇన్ఫర్మేషన్ టెక్నాలజీ, ఎలక్ట్రానిక్స్, కమ్యూనికేషన్స్ మరియు మానవ వనరుల అభివృద్ధి శాఖల మంత్రి శ్రీ నారా లోకేష్ సమక్షంలో గూగుల్ క్లౌడ్ ఇండియా వైస్ ప్రెసిడెంట్, కంట్రీ ఎండి బిక్రమ్ సింగ్ బేడీ, ఆంధ్రప్రదేశ్ రియల్ టైమ్ గవర్నెన్స్ సొసైటీ కార్యదర్శి శ్రీ ఎస్ సురేష్ కుమార్ మధ్య జరిగింది.
ఈ అవగాహన ఒప్పందం ప్రకారం, ఆరోగ్య సంరక్షణ మరియు పర్యావరణ సుస్థిరత వంటి కీలకమైన అంశాలలో ఏఐ మరియు ఎంఎల్ సొల్యూషన్‌లను ఏకీకృతం చేయడానికి ఆంధ్రప్రదేశ్ ప్రభుత్వంతో గూగుల్ కలిసి పనిచేస్తుంది. ఏఐ ఆధారిత ఆర్థిక వ్యవస్థలో వృద్ధి చెందడానికి అవసరమైన శిక్షణ మరియు వనరులను ప్రజలకు అందించడం ద్వారా నైపుణ్యాభివృద్ధిని ప్రోత్సహించడం, డిజిటల్ విభజనను పూరించడంపై కూడా ఈ భాగస్వామ్యం దృష్టి సారిస్తుంది. అదనంగా, ఏఐ రంగంలో ఆవిష్కరణలు మరియు వ్యవస్థాపకతకు తోడ్పడేందుకు, రాష్ట్ర స్టార్టప్ పర్యావరణ వ్యవస్థకు సైతం గూగుల్ మద్దతు ఇస్తుంది.
గౌరవనీయులైన ఆంధ్రప్రదేశ్ ముఖ్యమంత్రి శ్రీ నారా చంద్రబాబు నాయుడు మాట్లాడుతూ, “ఏఐ సొల్యూషన్స్‌ను ఏకీకృతం చేయడానికి మరియు ఆంధ్రప్రదేశ్ వృద్ధిని వేగవంతం చేయడానికి గూగుల్‌తో భాగస్వామ్యం చేసుకున్నందుకు మేము సంతోషిస్తున్నాము. ఈ భాగస్వామ్యం మన ప్రజల అభ్యున్నతి కోసం సాంకేతికతను ఉపయోగించాలనే మా లక్ష్యానికి అనుగుణంగా ఉంటుంది. రాష్ట్రవ్యాప్తంగా ఆవిష్కరణ మరియు వృద్ధి కోసం అభివృద్ధి చెందుతున్న వాతావరణాన్ని నిర్మించడంతో పాటుగా ఏఐ యొక్క శక్తిని ఉపయోగించడం ద్వారా ప్రతి వ్యక్తి మరియు వ్యాపారానికి సాధికారత కల్పించాలని లక్ష్యంగా పెట్టుకున్నాము" అని అన్నారు .
ఆంధ్రప్రదేశ్ ఇన్ఫర్మేషన్ టెక్నాలజీ, ఎలక్ట్రానిక్స్ మరియు కమ్యూనికేషన్స్ మరియు మానవ వనరుల అభివృద్ధి శాఖల మంత్రి శ్రీ నారా లోకేష్ మాట్లాడుతూ, “ఈ ప్రయాణంలో ఆంధ్రప్రదేశ్ కోసం ఏఐ ఆధారిత భవిష్యత్తును నిర్మించడానికి గూగుల్ తో కలిసి పనిచేయడానికి మేము సంతోషిస్తున్నాము. సాంకేతికత అనేది ప్రజలకు సేవ చేసే రీతిలో వుండాలని మేము ఎల్లప్పుడూ విశ్వసిస్తుంటాము మరియు ఇప్పుడు ఏఐతో, గొప్ప సామర్థ్యాన్ని మేము చూస్తున్నాము. ఇక్కడ ప్రతి పౌరుడు, వ్యాపారాన్ని ఆవిష్కరించడానికి, రాణించడానికి ఏఐ తగిన శక్తినిస్తోంది. గూగుల్‌తో మా భాగస్వామ్యం ఈ దార్శనికతను సాధించే దిశగా ఒక ముఖ్యమైన అడుగు. సమిష్టిగా, క్లిష్టమైన రంగాలలో ఏఐ పురోగతిని నడిపించే సమగ్ర, స్థిరమైన పర్యావరణ వ్యవస్థను రూపొందించాలని మేము లక్ష్యంగా పెట్టుకున్నాము. ఏఐ- సిద్ధంగా ఉన్న వర్క్‌ఫోర్స్‌ను, ఏఐలో శక్తివంతమైన స్టార్టప్ పర్యావరణ వ్యవస్థను నిర్మించడంలో, అందరికీ ఏఐ యొక్క శాశ్వత ప్రయోజనాలను నిర్ధారించడంలో కూడా కీలకంగా ఈ భాగస్వామ్యం నిలువనుంది "అని అన్నారు.
గూగుల్ క్లౌడ్ ఇండియా వైస్ ప్రెసిడెంట్ మరియు కంట్రీ ఎండి బిక్రమ్ సింగ్ బేడీ మాట్లాడుతూ, “ఆంధ్రప్రదేశ్ ప్రభుత్వంతో ఈ భాగస్వామ్యం భారతదేశానికి సమగ్రమైన మరియు స్థిరమైన డిజిటల్ భవిష్యత్తును పెంపొందించాలనే మా నిబద్ధత దిశగా మరో ముందడుగు. ఏఐ - సిద్ధంగా ఉన్న వర్క్‌ఫోర్స్‌ను పెంపొందించడం, స్థానిక స్టార్టప్‌లకు మద్దతు ఇవ్వడం మరియు ఆరోగ్య సంరక్షణ మరియు పర్యావరణ సుస్థిరత వంటి రంగాలలో క్లిష్టమైన సవాళ్లను పరిష్కరించాలనే రాష్ట్ర లక్ష్యంతో గూగుల్ యొక్క ఏఐ నైపుణ్యాన్ని కలపడానికి మేము సంతోషిస్తున్నాము. రాష్ట్రవ్యాప్తంగా పురోగతి, జీవితాలను మెరుగుపరచడం మరియు అభివృద్ధి మరియు సమ్మిళితలను ప్రోత్సహించడానికి ఏఐ యొక్క పరివర్తన సామర్థ్యాన్ని వినియోగించుకోవడానికి ఆంధ్రప్రదేశ్ ప్రభుత్వంతో భాగస్వామ్యం కోసం మేము ఎదురుచూస్తున్నాము.." అని అన్నారు.
ఈ ఎంఓయూ కింద చేపట్టబోయే ముఖ్య కార్యక్రమాలు:
నైపుణ్యాభివృద్ధి మరియు విద్య: విద్యార్థులు, డెవలపర్‌లు మరియు వర్క్‌ఫోర్స్‌ను క్లిష్టమైన ఏఐ నైపుణ్యాలతో సన్నద్ధం చేయడానికి, గూగుల్ ఏఐ ఎస్సెన్షియల్స్ కోర్సు కోసం 10,000 సర్టిఫికేట్‌లను గూగుల్ అందజేస్తుంది. గూగుల్ ఏఐ ఎస్సెన్షియల్స్ కోర్సు అనేది ఫౌండేషనల్ కోర్సు. ఇది ప్రజలకు తమ పనిలో మరియు రోజువారీ జీవితంలో ఏఐని ఎలా ఉపయోగించాలో, ఉత్పాదకత మరియు సామర్థ్యం మెరుగుపరుచుకోవాలో నేర్పుతుంది. సైబర్‌ సెక్యూరిటీ, డేటా అనలిటిక్స్ మరియు జెనరేటివ్ ఏఐ వంటి రంగాల్లో గూగుల్ క్లౌడ్ సర్టిఫికేషన్‌లు మరియు స్కిల్ బ్యాడ్జ్‌లతో సహా ప్రభుత్వ ఏజెన్సీల కోసం స్కిల్లింగ్ ప్రోగ్రామ్‌లను అందించడానికి గూగుల్ క్లౌడ్ ప్రభుత్వంతో సహకరిస్తుంది. అదనంగా, కంప్యూటర్ సైన్స్ విద్య కోసం పెరుగుతున్న డిమాండ్‌ను తీర్చడానికి అధ్యాపకులకు గూగుల్ వనరులు మరియు మద్దతును అందిస్తుంది. స్కిల్లింగ్ ఇనిషియేటివ్‌లలో గూగుల్ డెవలపర్ కమ్యూనిటీ ప్రోగ్రామ్‌లు మరియు ఆండ్రాయిడ్ మరియు యాప్ స్కిల్లింగ్ డెవలప్‌మెంట్ ట్రైనింగ్‌లకు అవకాశాలను కూడా అందిస్తుంది.
స్టార్టప్ ఎకోసిస్టమ్ ఎనేబుల్మెంట్: ఆవిష్కరణ మరియు వ్యవస్థాపకతను ప్రోత్సహించడానికి, మెంటర్‌షిప్ మరియు నెట్‌వర్కింగ్ అవకాశాలను అందించడానికి మరియు స్టార్టప్ యాక్సిలరేటర్ ప్రోగ్రామ్‌ల కోసం గూగుల్‌కి యాక్సెస్‌ను అందించడానికి ఆంధ్రప్రదేశ్ స్టార్టప్ ఎకోసిస్టమ్‌తో గూగుల్ కలిసి పని చేస్తుంది. అదనంగా, అర్హత కలిగిన ఏఐ స్టార్టప్‌లు క్లౌడ్ క్రెడిట్‌లు, సాంకేతిక శిక్షణ మరియు వ్యాపార మద్దతును పొందుతాయి.
సుస్థిరత: గాలి నాణ్యత, పట్టణ ప్రణాళిక మరియు విపత్తు నిర్వహణకు సంబంధించిన పర్యావరణ సుస్థిరత సవాళ్లను పరిష్కరించడానికి ఏఐని వర్తింపజేయడం.
ఆరోగ్య సంరక్షణ: నాణ్యమైన సంరక్షణకు ప్రాప్యతను మెరుగుపరచడానికి మరియు రోగి ఫలితాలను మెరుగుపరచడానికి ఆరోగ్య సంరక్షణలో ఏఐ యొక్క స్వీకరణను వేగవంతం చేయటం. భాగస్వాముల ద్వారా హెల్త్ ఏఐ ఇమేజింగ్ మోడల్‌లకు అవకాశాలను అందించడం, పెద్ద భాషా నమూనాల (LLMలు) ద్వారా హెల్త్‌కేర్‌లో ఉత్పాదక ఏఐ యొక్క అప్లికేషన్‌లను అన్వేషించడం, హెల్త్ ఏఐ డెవలపర్ ఫౌండేషన్స్ (HAI-DEF) ద్వారా పరిశోధన కార్యక్రమాలకు మద్దతు ఇవ్వడం ఇందులో ఉన్నాయి.
ఏఐ పైలట్‌లు: వ్యవసాయం, ట్రాఫిక్ నిర్వహణ, వెబ్‌సైట్ ఆధునీకరణ మరియు పౌరుల ఫిర్యాదుల పరిష్కారం తదితర రంగాలలో క్లౌడ్ టెక్నాలజీ మరియు ఏఐ ప్రయోజనాలను ప్రదర్శించడానికి కీలక రంగాలలో పైలట్ ప్రాజెక్ట్‌లకు గూగుల్ సహకరిస్తుంది.
