సెల్‌ఫోన్ కాన్ఫరెన్స్ కాల్ ఓ మోసగాడి బారి నుంచి ఓ యువతి జీవితాన్ని కాపాడింది. తెలంగాణ రాష్ట్రంలోని ఆదిల్లాలోని ఓ మండలానికి చెందిన ఓ యువకుడికి మరో మండలానికి చెందిన యువతితో నెల రోజుల కిందట పెళ్లి నిశ్చయమైంది. వివాహానికి ముహూర్తం పెట్టుకున్నారు. రెండు కుటుంబాలు పెళ్లి పనుల్లో నిమగ్నమయ్యాయి. ఈ క్రమంలో ఓ రోజు కాబోయే భర్తతో మాట్లాడేందుకు సదరు యువతి యత్నించగా, అప్పటికే అతడు మరో యువతితో ఫోనులో మాట్లాడుతున్నాడు. ఆ కాల్‌ను హోల్డ్‌లో పెట్టి ఈ కాల్ లిఫ్ట్ చేసి బైకుపై ఉన్నానని మళ్లీ కాల్ చేస్తానంటూ పెల్లి చేసుకోబోయే యువతికి చెప్పాడు.
ఆ తర్వాత ఈ కాల్‌ను కట్ చేయబోయి అనుకోకుండా మెర్జ్ చేయడంతో కాన్ఫరెన్స్ కాల్‌లో మరో యువతితో ప్రేమాయణం సాగిస్తున్న యువకుడు గుట్టు పెళ్లి చేసుకోబోయే యువతికి అర్థమైంది. వారిద్దరి మధ్య నడుమ సాగిన సంభాషణను రికార్డు చేసి ఈమె పెద్దల ముందు పెట్టింది. దీంతో మరికొద్ది రోజుల్లో జరగాల్సిన వివాహాన్ని రద్దు చేసుకుని కట్నం, డబ్బులను తిరిగి తీసుకున్నాడు. ఓ కాన్ఫరెన్స్ కాల్ ఇలా పెళ్ళి రద్దుకు దారితీయడం ఇరు కుటుంబాల బంధువుల్లో తీవ్ర చర్చనీయాంంగా మారింది.
