చిన్నపాటి రోడ్డులో ముందు కర్రల లోడుతో వెళుతున్న ట్రాక్టర్ కారణంగా ఓ ఆర్టీసీ బస్సు డ్రైవర్ బస్సును పక్కని ఆపేశాడు. ఆ తర్వాత ప్రయాణికులకు వినోదం అందించే నిమిత్తం బస్సు ముందు డ్యాన్స్ చేశాడు. దీన్ని ఓ ప్రయాణికుడు వీడియో తీసి సోషల్ మీడియాలో షేర్ చేయడంతో అది వైరల్ అయింది. దీన్ని చూసిన ఆర్టీసీ అధికారులు ఆగ్రహం వ్యక్తం చేస్తూ ఆ డ్రైవర్‌ను విధుల నుంచి తొలగించారు.
ఆ డ్రైవర్ పేరు లోవరాజు. కాకినాడ జిల్లా తుని ఆర్టీసీ డిపోలో ఔట్ సోర్సింగ్ విధానంలో పని చేస్తున్నాడు. ఈ నెల 24వ తేదీన రౌతులపూడి నుంచి తుని డిపోకు వెళుతుండగా మార్గమధ్యంలో కర్రల లోడు ట్రాక్టర్ అడ్డొచ్చింది. చిన్న రోడ్డు కావడం, బస్సు ముందుకు వెళ్లలేని పరిస్థితి ఉండటంతో బస్సును నిలిపివేశాడు. అదేసమయంలో ఆ యువకుడు వీడియో తీస్తుండటంతో లోవరాజు బస్సు ముందు డ్యాన్స్ చేసే ప్రయాణికులను వినోదం పంచాడు. ఇందుకు సంబంధించిన వీడియో వైరల్ కావడంతో ఆర్టీసీ అధికారులు అతడికి విధులు కేటాయించకుండా పక్కనబెట్టారు.
ఈ వీడియోను చూసిన మహిష్మ కే అనే యూజర్ స్పందిస్తూ మీరు ట్వీట్ చేయకముందే ఈ డ్రైవర్‌ను సస్పెండ్ చేశారట అన్నా.. దయచేసి ఈ విషయంలో జోక్యం చేసుకోండి. క్రమశిక్షణ, సమయ పాలన ముఖ్యమేకానీ హాని చేయని వినోదం నేరం కాదని పేర్కొన్నారు.
అమెరికాలోని ఉన్న లోకేశ్ ఈపోస్టు చూసిన వెంటనే స్పందించారు. సస్పెన్షన్ ఉత్తర్వులు రద్దు చేస్తారని వెంటనే అతడిని ఉద్యోగంలోకి తీసుకుంటారని, తాను వచ్చిన వెంటనే వీలు చూసుకుని లోవరాజును కలుస్తారని మరో పోస్టు చేశారు. లోకేశ్ పోస్టుతో లోవరాజును అధికారులు మళ్లీ విధుల్లోకి తీసుకున్నారు.
