ఏపీ సీఎం వైఎస్ జగన్మోహన్ రెడ్డి ఢిల్లీలో పర్యటించనున్నారు. ఈ పర్యటనలో భాగంగా ప్ర‌ధానమంత్రి న‌రేంద్ర మోదీతో భేటీకానున్నారు.
రాష్ట్రంలో ప్రస్తుత పరిస్థితులపై చర్చించనున్నట్లు సమాచారం. అనంత‌రం రాష్ట్ర‌ప‌తి ద్రౌప‌ది ముర్ము, ఉప రాష్ట్ర‌ప‌తి జ‌గ‌దీప్ ధ‌న్ ఖ‌డ్ ల‌ను మ‌ర్యాద‌పూర్వ‌కంగా క‌లువ‌నున్నారని సమాచారం.
ఢిల్లీ పర్యటనలో భాగంగా జగన్మోహన్ రెడ్డి ఆదివారం సాయంత్రం 6.30 గంటలకు తాడేప‌ల్లి నుంచి బ‌య‌లుదేర‌నున్నారు. రాత్రి 9.15 గంటలకు ఢిల్లీ చేరుకుని జ‌న్ ప‌థ్ నివాసంలో బ‌స చేయనున్నారు.
సోమ‌వారం ఉద‌యం ప్రధాని మోదీతో ఆయ‌న భేటీకానున్నారు. పోలవరం ప్రాజెక్టుతో పాటు రాష్ట్రానికి రావాల్సిన నిధుల అంశంపై ప్రధాని మోదీకి వినతిపత్రం సమర్పించనున్నారు.
పోలవరం ప్రాజెక్టుకు సంబంధించి రాష్ట్రప్రభుత్వం వెచ్చించిన రూ. 2,900 కోట్ల నిధులను విడుదల చేయాలని ప్రధానిని జగన్ కోరనున్నారు.
అలాగే ముంపు మండలాల్లో జనం పునరావాసానికి నిధులివ్వాల్సిందిగా ప్రధానికి వినతిపత్రం సమర్పిస్తారు. సవరించిన అంచనాల ప్రకారం రూ. 55వేల 548.87 కోట్ల విడుదలకు అనుమతివ్వాల్సిందిగా సీఎం జగన్ కోరనున్నారు.
