ఆంధ్రప్రదేశ్ రాష్ట్రంలోని టీడీపీ, జనసేన, బీజేపీ కూటమి ప్రభుత్వం మరో కీలక నిర్ణయం తీసుకుంది. గతంలో తెలుగుదేశం పార్టీ ప్రవేశపెట్టి అందిస్తూ వచ్చిన చంద్రన్న కానుకల పథకాన్ని మళ్లీ పునఃప్రారంభించాలని నిర్ణయించింది. ఈ పథకం అమలు చేస్తే ప్రభుత్వ ఖజానాపై రూ.538 కోట్ల మేరకు అదనపు భారం పడనుంది. అయితే, గత వైకాపా ప్రభుత్వంలో ఈ పథకాలను నిలిపివేసిన విషయం తెల్సిందే. ఇపుడు మళ్లీ కూటమి ప్రభుత్వం ఈ పథాన్ని పునరుద్ధరించేలా నిర్ణయం తీసుకుంది. ఈ పథకాలను పునరుద్ధరించేందుకు పౌరసరఫరాలశాఖ కసరత్తు ప్రారంభించింది.
సంక్రాంతి, రంజాన్, క్రిస్మస్ సందర్భంగా పేదలకు పంపిణీ చేసే ఈ కానుకల కోసం ప్రభుత్వం ఏడాదికి రూ.538 కోట్లు ఖర్చు చేయాల్సి ఉంటుంది. ఈ లెక్కన ఐదేళ్లకు రూ.2,690 కోట్ల అదనపు భారం ప్రభుత్వంపై పడనుంది. ఈ పథకం కింద చంద్రన్న సంక్రాంతి కానుక, క్రిస్మస్ కానుక కింద అరకేజీ కందిపప్పు, అరకేజీ శనగపప్పు, అరకిలో బెల్లం, అర లీటరు పామాయిల్, కిలో గోధుమపిండి, రూ.100 గ్రాముల నెయ్యితో కూడిన కిట్లను కార్డుదారులకు అందిస్తారు.
అయితే, రంజాన్ తోఫాలో 2 కేజీల పంచదార, 5 కేజీల గోధుమపిండి, కిలో సేమియా, 100 గ్రాముల నెయ్యి ఇస్తారు. అలాగే, రెగ్యులర్ కోటా కింద రేషన్కార్డుదారులకు ఉచిత బియ్యంతోపాటు పంచదార, కందిపప్పు, గోధుమపిండి, జొన్నలు, సజ్జలు కూడా అందించాలని ప్రభుత్వం నిర్ణయించింది. ఈ పథకాన్ని కేవలం తెల్ల రేషన్ కార్డు దారులకు మాత్రమే పంపిణీ చేయనుంది.
