ఆంధ్రప్రదేశ్ రాష్ట్రంలో పెను చర్చకు దారితీసిన వైకాపా హిందూపురం ఎంపీ గోరంట్ల మాధవ్‌కు చెందిన నగ్న వీడియోపై అనంతపురం ఎస్పీ కీలక ప్రకటన చేశారు. అది గోరంట్ల మాధవ్ నిజమైన వీడియో కాదని, ఫేక్ వీడియో అని ప్రకటించారు.
ఈ మేర‌కు బుధవారం సాయంత్రం అనంత‌పురంలో మీడియా ముందుకు వ‌చ్చిన జిల్లా ఎస్పీ ఫ‌కీర‌ప్ప కీలక ప్రకటన చేశారు. ఈ వీడియో ప‌లుమార్లు షేర్ అయినందువ‌ల్ల... ఆ వీడియో ఒరిజిన‌లా?, ఫేకా? అన్న విష‌యాన్ని తేల్చ‌డం క‌ష్టంగా మారింద‌న్నారు.
ఎంపీకి చెందిన‌దిగా భావిస్తున్న ఈ వీడియో ఇంగ్లండ్‌లో రిజిష్ట‌ర్ అయిన నెంబ‌రు నుంచి సోష‌ల్ మీడియాలో అప్‌లోడ్ అయ్యింద‌ని ఫ‌కీర‌ప్ప చెప్పారు. ఈ వీడియో తొలుత ఐటీడీపీకి చెందిన వాట్సాప్ గ్రూప్‌లో షేర్ అయ్యింద‌ని ఆయ‌న తెలిపారు. ఈ వీడియోపై ఎంపీ గోరంట్ల మాధవ్ ఇచ్చిన ఫిర్యాదు మేర‌కు కేసు న‌మోదు చేశామ‌న్నారు.
ఈ వీడియోను ఇంగ్లండ్‌లోనే అప్‌లోడ్ చేసిన‌ట్లుగా తెలుస్తోంద‌న్నారు. ఈ వీడియోను అప్‌లోడ్ చేసిన వ్య‌క్తి వివ‌రాల‌ను సేక‌రిస్తున్నామ‌ని చెప్పారు. ఇక ఈ వీడియో ఒరిజిన‌లా?, న‌కిలీనా? అన్న‌ది తేల్చాలంటే ఒరిజిన‌ల్ వీడియో అందుబాటులో ఉంటేనే సాధ్య‌మ‌న్నారు. ఒరిజిన‌ల్ వీడియో ఉంటేనే ఫోరెన్సిక్ ల్యాబ్‌కు పంపగ‌ల‌మ‌ని, లేకుంటే అది సాధ్యంకాదని చెప్పారు.
