ఏపీ ముఖ్యమంత్రి జగన్మోహన్ రెడ్డి వ్యవహారం చూస్తే మంచి పోలీసును మహాముదురు దొంగ తరిమినట్టుందని టీడీపీ యువనేత లోకేశ్ వ్యాఖ్యానించారు. నిడదవోలు సభలో జగన్ చేసిన వ్యాఖ్యలకు శనివారం ఆయన కౌంటర్ ఇచ్చారు. 'రూ.42 వేల కోట్ల ప్రజాధనం దోచి 38 కేసుల్లో మొదటి నిందితుడు ఈ సైకో జగన్. అలాంటివాడు చంద్రబాబుపై తప్పుడు కేసుపెట్టి అరెస్టు చేయించడమే కాకుండా ములాఖత్ - మిలాఖత్ అంటూ పంచ్ డైలాగులు కొడుతున్నారు.
చంచల్‌గూడా జైల్లో నీ ములాఖత్‌ల గురించి మర్చిపోయావా? గత అసెంబ్లీ ఎన్నికల్లో టీడీపీని ఓడించడానికి తెర వెనుక అయిన మిలాఖత్‌లు గుర్తులేవా జగన్. పరమ అవినీతిపరుడు నీతివంతులకు అవినీతిని అంటగట్టడం ఒక మానసిక రుగ్మత. దీనిని మెగలోమేనియా డిజార్డర్ అంటారు.
చంద్రబాబును ఆరెస్టు చేయించడానికి లండన్‌లో 10 రోజులు దాక్కొన్నాడు జగన్. ఆ సమయంలో ఈ మానసిక రుగ్మతకు వైద్యం చేయించుకొని ఉండాల్సిందని లోకేశ్ వ్యాఖ్యానించారు. ఇంట్లో సొంత వాళ్లకుకాలేని బిడ్డ ఊరందరికీ ఆవుతాడా అని నారా లోకేశ్ ట్వీట్ చేశారు.
