హైదరాబాద్ నగరంలోని అమీర్‌పేటలో ఉన్న ఓయో టౌన్ విల్లా హోటల్‌లో గుట్టుచప్పుడు కాకుండా కొనసాగుతూ వచ్చిన వ్యభిచారాన్ని పోలీసులు రట్టుచేశారు. ఈ కేసులో పలువురు విటులను అరెస్టు చేసి అమ్మాయిలను అదుపులోకి తీసుకున్నారు.
ఎస్‌ఆర్ నగర్ పోలీసుల కథనం ప్రకారం.. ధరమ్‌కరణ్ రోడ్డులోని ఓయో టౌన్ విల్లా హోటల్‌లో వ్యభిచారం జరుగుతున్నట్టు పోలీసులకు సమాచారం అందింది. దీంతో వెస్ట్‌జోన్ టాస్క్‌ఫోర్స్ పోలీసులు సోమవారం రాత్రి ఆకస్మిక దాడి నిర్వహించారు.
ఈ సోదాల్లో వ్యభిచారం చేస్తున్న వారిని రెడ్‌హ్యాండెడ్‌గా పట్టుకున్నారు. ఇద్దరు యువతులు, హోటల్ మేనేజర్ ప్రేమ్‌తోపాటు రాజమండ్రికి చెందిన నిర్వాహకుడు నాని అలియాస్ జోగేశ్వర్‌లను అదుపులోకి తీసుకున్నారు. మరో నిర్వాహకుడు అరవన్ పరారయ్యాడు. కేసు నమోదు చేసుకున్న పోలీసులు దర్యాప్తు చేస్తున్నారు.
