అవినీతి ఆరోపణల కేసులో ఒక ఎస్ఐ, కానిస్టేబుల్‌పై కృష్ణా ఎస్పీ సస్పెన్షన్ విధించారు. పోలీస్ అంటే ప్రజల్లో అపారమైన నమ్మకం ఉంటుంద‌ని, వారికి సమస్య వస్తే వెంటనే ఆశ్రయించేది పోలీసుల‌నే అని, అలాంటి పోలీస్ శాఖ పరువు ప్రతిష్టలు దెబ్బతీసేలా ఏ సిబ్బంది వ్యవహరించినా వారిపై కఠిన చర్యలు తప్పవని ఎస్పీ సిద్ధార్థ్ కౌశల్ స్ప‌ష్టం చేశారు.
అవినీతి ఆరోపణలు ఎదుర్కొన్న, సిబ్బంది సొంత ప్రయోజనాలకు ప్రజలను ఇబ్బందులకు గురి చేస్తున్న వారిపై శాఖాపరంగా చర్యలు తీసుకోవడమే కాక, క్రిమినల్ కేసులు నమోదు చేయ‌డానికి వెనుకాడబోనని హెచ్చరికలు జారీ చేశారు.
అక్ర‌మ మద్యం స‌ర‌ఫ‌రా చేసిన కేసులో అడిగినంత లంచం ఇవ్వకుంటే మ‌రిన్ని బ‌నాయిస్తామని, ఒక యువకుడిని చిల్లకల్లు కానిస్టేబులు బెదిరించాడు. దీనితో ఆ యువకుడు ఓ సెల్ఫీ వీడియో తీసి మ‌రీ పోలీసుల దాష్టీకాన్ని వివ‌రించాడు. అనంత‌రం అత‌ను ఆత్మ‌హ‌త్య‌కు పాల్ప‌డ్డాడు. దీనికి కారణమైన చిల్లకల్లు పోలీస్ స్టేషన్ కానిస్టేబుల్ ఎం.శివరామ కృష్ణ ప్రసాద్‌ను స‌స్పెండ్ చేశారు.
అంతే కాకుండా సిబ్బంది విధులు పట్ల సరైన పర్యవేక్షణ లేకుండా పోయినందుకు చిల్లకల్లు ఎస్ఐ కె.దుర్గా ప్రసాద్ రావుపై సస్పెన్షన్ వేటు విధిస్తూ జిల్లా ఎస్పీ శ్రీ సిద్ధార్థ కౌశల్ ఉత్త‌ర్వులు జారీ చేశారు.
