తమిళ స్టార్ హీరో సూర్యపై ఓ ఫుట్‌బాల్ ప్లేయర్ కేసు పెట్టాడు. అసలు విషయాని కొస్తే టీనగర్లో ఓ బ్యూటీ సెలూన్ నిర్వహిస్తున్న లెనిన్ ఇమాన్యుయెల్ (25) అనే వ్యక్తి తన స్నేహితుడు, చెన్నై ఫుట్‌బాల్ అసోసియేషన్ (సీఎఫ్ఏ) టీంలో ప్రముఖ క్రీడాకారుడు ప్రేమ్ కుమార్ (21)తో కలిసి ఫుట్ బాల్ ఆడేందుకు అడయార్ ప్రాంతం మీదుగా వెళుతున్నాడు. కాగా ఆ సమయంలోనే అటువైపు ఓ కారు వేగంగా వచ్చి వెంటనే బ్రేక్ వేసింది. దీంతో బైక్ నడుపుతున్న వారు కారును బలంగా ఢీ కొట్టడంతో ఇద్దరికి గాయాలయ్యాయి. కానీ ఆ కారు నడిపింది ఓ మహిళ. దీంతో కారు నిర్లక్ష్యంగా నడపడమే కాకుండా బైక్‌ని ధ్వంసం చేశారని, తమకు గాయాలవ్వడానికి కారణమైన ఆమెని డబ్బులు ఇవ్వమని డిమాండ్ చేశారు.
అదేసమయంలో అటువైపుగా హీరో సూర్య వచ్చారు. వారు మహిళను వేధిస్తుంటే గమనించిన సూర్య ఆ యువకులను తిట్టడమే కాకుండా, ఫుట్‌బాల్ ఆటగాడైన తన స్నేహితుడిపై చేయి చేసుకున్నాడని లెనిన్ పేర్కొన్నాడు. అయితే సూర్య మేనేజర్ మాత్రం ఆయన ఎవరి మీద చెయ్యి చేసుకోలేదని, మహిళతో పద్ధతిగా నడుచుకోవాలని ఆ యువకులను హెచ్చరించారని చెప్పారు. ట్రాఫిక్ కారణంగా వాహనాలు భారీగా నిలిచిపోవడంతో గొడవని విరమించుకొని చెప్పి సూర్య అక్కడ నుండి వెళ్లిపోయినట్లు తెలియజేసారు.