బ్లాక్ అండ్ వైట్ సినిమాల నుంచి ఫైట్ మాస్టర్ స్థాయికి ఎదిగిన రాజు సోమవారం తెల్లవారు జామున మృతి చెందారు. చీరాలలోని ఓ ప్రైవేటు ఆస్పత్రిలో ఆయన తుది శ్వాస విడిచారు. గుండెపోటు రావడంతో ఆయనను ఆస్పత్రికి తరలించారు.
రాజు స్వస్థలం ప్రకాశం జిల్లాలోని వేటపాలెం. అగ్రహీరోలైన ఎన్టీఆర్, బాలకృష్ణ, చిరంజీవి వంటి వారి చిత్రాలకు ఫైట్స్ కంపోజ్ చేసి మంచి పేరు తెచ్చుకున్నారు. చిరంజీవి ఖైదీలో కొత్తగా ఫైట్స్ కంపోజ్ చేసి ట్రెండ్ సృష్టించారు.
ఆయనకు భార్య, కుమారుడు, కుమార్తె ఉన్నారు. కుమారుడు రవి కూడా ఫైటరే. కానీ రెండు చిత్రాల్లో హీరోగా నటించాడు. చార్మినార్ చిత్రంలో ఆయన హీరో. రాజు శిష్యులు ఎందరో సినీ రంగంలో ఉన్నారు. ఆయన భారీకాయుడైనప్పటికీ ఫైట్స్ చేయడంలో సునాయసంగా చేసేవారు.
రాజు మృతి సందర్భంగా తెలుగు చలనచిత్ర ఫైటర్స్ అసోసియేషన్ తీవ్ర సంతాపాన్ని తెలియజేస్తూ, ఆయనతో తమకు గల సంబంధాన్ని మననం చేసుకుంది. మూవీ ఆర్ట్స్ అసోసియేషన్, డైరెక్టర్స్ అసోసియేషన్ కూడా సంతాపాన్ని తెలియజేశారు.