దేశంలోని సంఘ్ పరివార్‌కు మరో గట్టి ఎదురుదెబ్బ తగిలింది. అజ్మీర్ దర్గాలో 2007లో జరిగిన బాంబు పేలుళ్ళ కేసులో రాష్ట్రీయ స్వయం సేవక్ సంఘ్ (ఆర్ఎస్ఎస్) నేత స్వామి అసీమానందను అరెస్టు చేయాల్సిందిగా స్థానిక కోర్టు ఆదేశించింది. ఈ మేరకు రాజస్థాన్ యాంటీ టెర్రరిస్ట్ స్క్వాడ్‌కు కోర్టు ఉత్తర్వులు జారీ చేసింది. మితవాద గ్రూపునకు చెందిన అభినవ్ భారత్‌ సభ్యుడైన అసీమానంద అజ్మీర్ బాంబు పేలుళ్ళ కేసులో నిందారోపణలు ఎదుర్కొంటున్న విషయం తెల్సిందే. ఈ పేలుళ్ళలో ముగ్గురు మృత్యువాత పడ్డారు.
ఈ కేసులో అసీమానందను కోర్టులో హాజరుపరచాలని గత గురువారం కోర్టు రాష్ట్ర ఏటీఎస్‌కు ఆదేశాలు జారీచేయడంతో ఆ విధంగా కోర్టులో హాజరుపరిచారు. ఈ కేసులో చీఫ్ జ్యుడిషియల్ మేజిస్ట్రేట్ రతన్ లాల్ మూంద్ తాజాగా అసీమానందను అరెస్టు చేయాల్సిందిగా ఆదేశాలు జారీ చేశారు.
2007లో మక్కా మసీదులో జరిగిన పేలుళ్ళ కేసులో సంబంధముందనే ఆరోపణలపై గత యేడాది నవంబరు నెలలో అసీమానందను అరెస్టు చేశారు. ఈ కేసులో తన పాత్రపై మేజిస్ట్రేట్ ఎదుట వాంగ్మూలం కూడా ఇచ్చాడు. 2007లో 37 మంది ప్రాణాలు తీసిన మాలేగావ్‌లో జరిగిన పేలుళ్ళకు మితవాద గ్రూపులో కారణమని అసీమానంద వాంగ్మూలం ఇచ్చాడు.
