రాష్ట్ర ఆరోగ్య మంత్రి డీఎల్.రవీంధ్రా రెడ్డి చేస్తున్న సవాళ్లు, ప్రతి సవాళ్ళపై కిరణ్ కుమార్ మంత్రివర్గానికి చెందిన ఇతర సహచరులు తీవ్ర అసహనం, అసంతృప్తి వ్యక్తం చేస్తున్నట్టు సమాచారం. బాధ్యతాయుతమైన మంత్రి పదవిలో ఉంటూ సవాళ్లు, ప్రతిసవాళ్లకు విసురుకోవడం ఆయనకు మంచిది కాదన్నారు.
ముఖ్యంగా, మంత్రి డీఎల్ వ్యవహరిస్తున్న తీరు చూస్తుంటే కూర్చొన్న చెట్టు కొమ్మనే నరుతున్న చందంగా ఉందని వారు వాపోతున్నారు. అసలే ఆగ్రహంతో రగిలిపోతున్న యువనేత జగన్‌ వర్గాన్ని మరింత రెచ్చగొట్టేలా మంత్రి డీఎల్ వ్యాఖ్యలు చేయడాన్ని వారు తప్పుబడుతున్నారు.
ఇది కేవలం మంత్రికి మాత్రమే కాకుండా ఇటూ ముఖ్యమంత్రి ఎన్‌.కిరణ్ కుమార్ రెడ్డికి, అటూ పార్టీ నేతలకు ఎంత మాత్రం నచ్చడం లేదని పలువురు అంతర్గతంగా అంటున్నారు. అనవసరంగా ఉద్రేకాలకు పోయి ఓడిపోతే రేపటి రోజు పార్టీ పరువు ఏమవుతుంది? పైగా ప్రభుత్వంలో, ఒక మంత్రిగా బాధ్యత గల హోదాలో ఉన్న డీఎల్ ఆ విధంగా రాజీనామాలకు సవాళ్ళు విసరడం భావ్యంకాదంటున్నారు.
ఇలా చేయడం ద్వారా తను కూర్చున్న చెట్టు కొమ్మనే నరికేసుకున్నట్లు, ప్రభుత్వం కూలిపోయే పరిస్థితిని సృష్టించుకున్న వాళ్ళమవుతామని డీఎల్ తీరుపై పార్టీ నేతలు తీవ్ర అసంతృప్తి, ఆగ్రహం వ్యక్తం చేస్తున్నట్టు తెలుస్తోంది. అయితే, మంత్రి డీఎల్ వ్యవహారశైలి చూస్తుంటే వెనక్కి తగ్గేలా కనిపించడం లేదు.
