రాష్ట్రంలో మధ్యంతర ఎన్నికలు ఏ క్షణమైనా జరుగవచ్చని తెలుగుదేశం పార్టీ అధినేత చంద్రబాబు నాయుడు సొంత పార్టీ నేతలతో అంటున్నారు. అందువల్ల ఈ ఎన్నికలను ఎదుర్కొనేందుకు పార్టీ శ్రేణులను సమాయాత్తం చేయాలని ఆయన నేతలకు పిలుపునిచ్చారు.
రాష్ట్రంలో ప్రస్తుతం చోటు చేసుకుంటున్న పరిణామాలపై ఆయన పార్టీ సీనియర్ నేతలతో నిరంతరం చర్చిస్తూనే ఉన్నారు. ఈ సందర్భంగా ఆయన నేతలతో మాట్లాడుతూ మధ్యంతర ఎన్నికలకు సిద్ధం కావాలని, ఈ ఎన్నికలు ఎపుడైనా జరుగవచ్చని అభిప్రాయపడుతున్నారు.
ప్రస్తుత పరిణామాలను నిశితంగా పరిశీలిస్తున్నామని, ఎలాంటి పరిస్థితులనైనా ఎదుర్కొనేందుకు సిద్ధంగా ఉన్నట్టు ఆ పార్టీకి చెందిన పొలిట్‌బ్యూరో నేత ఒక అన్నారు. ప్రస్తుత పరస్థితుల్లో చిరంజీవి నేతృత్వంలోని ప్రజారాజ్యం పార్టీ రాష్ట్రంలో మూడో అతిపెద్ద పార్టీగా ఉందన్నారు. అయితే, ఆ పార్టీ అధికార పార్టీతో చేతులు కలిపేందుకు నిర్ణయించుకోవడం వల్ల వచ్చే ఎన్నికల్లో ఆ హోదాను కూడా కోల్పోయే ప్రమాదం ఉందన్నారు.
