సినిమా రంగంలో రామ్‌గోపాల్‌ వర్మది ప్రత్యేకమైన శైలి.. ఆయన ఎప్పుడూ వివాదాలలో నలుగుతూనే ఉంటారు. వివాదం ఆయన ఊపిరి. వివాదాలతో పాపులర్ అవ్వాలనుకుంటారు. వివాదాలనే సొమ్ము చేసుకోవాలనుకుంటారో ఏమో... ఇప్పటికే నిర్మాణంలో ఉన్న బ్రూస్ లీ సినిమా పేరుతోనే తన దర్శకత్వంలో తెరకెక్కిస్తున్నారు. ట్రైలర్ కూడా విడుదల చేశారు.
ఈ చిత్రం ట్రైలర్‌ను విడుదల చేసినట్లు ఆయన తన ట్విట్టర్‌ ఖాతాలో పేర్కొన్నారు. రామ్‌చరణ్‌, రకుల్‌ప్రీత్‌ సింగ్‌లు జంటగా కొరటాల శివ దర్శకత్వంలో రూపుదిద్దుకుంటున్న చిత్రం పేరు కూడా 'బ్రూస్‌లీ' అన్న విషయం తెలిసిందే. అయితే అదే పేరుతో రామ్‌గోపాల్‌ వర్మ చిత్రాన్ని తెరకెక్కిస్తున్నారు. బ్రూస్ లీకి తానెంత అభిమానినో ఆయన ఇప్పటికే చెప్పేశారు కూడా.
ఆ సంగతి ఎలా ఉన్నా.. రెండు సినిమాలు ఒకే పేరుతో చిత్రీకరణ కావడంపై ప్రేక్షకుల్లో ఆసక్తి రేగుతోంది. ఎవరు నిజమైన సినీ బ్రూస్ లీ అని చర్చించుకుంటున్నారు.
