కోలీవుడ్ నడిగర్ సంఘం హీట్ రోజురోజుకీ పెరిగిపోతోంది. విశాల్ వర్సెస్ శరత్ కుమార్ ప్యానెళ్లు ఒకరిపై ఒకరు విమర్శలు చేసుకుంటున్నారు. నడిగర్ సంఘం ఎన్నికలు అక్టోబరు 18న జరుగనున్నాయి. ఈ నేపధ్యంలో నటుడు విశాల్ వర్సెస్ శరత్ కుమార్ ప్యానెల్స్ నువ్వా నేనా అనే రీతిలో ఢీకొంటున్నాయి. ఈ రెండు ప్యానెళ్లకు చెందిన నటులు ఇప్పటికే ఒకరిపై ఒకరు విమర్శనాస్త్రాలు సంధించుకుంటున్నారు. ఈ వ్యవహారం తారాస్థాయికి వెళ్లింది. రాధిక భర్త, నటుడు శరత్ కుమార్ సకలకళా వల్లభుడు అయిన కమలహాసన్ పైన మండిపడ్డారు. కమల్ కృతజ్ఞత లేని వారనీ, చేసిన మేలు మరచిన కృతఘ్నుడంటూ విమర్శించారు.
కమల్ హాసన్ నటించిన విశ్వరూపం చిత్రం విడుదల సమయంలో ఇబ్బందులు పడ్డప్పుడు తాను సాయం చేశాననీ, అలాగే ఉత్తమ విలన్ విడుదల సమయంలోనూ తన భార్య రాధికా సాయం చేసినా నడిగర్ సంఘం ఎలాంటి సాయం చేయలేదని కమల్ అనడం కృతఘ్నుత కాక ఇంకేమిటి అంటూ ప్రశ్నించారు. ఈ ఎన్నికల్లో కమలహాసన్ పోటీ జట్టుకు పరోక్షంగా మద్దతు పలుకుతున్నారని శరత్‌కుమార్ ఆరోపించారు.
కాగా విశాల్, శరత్ కుమార్ ప్యానెళ్లు తమతమ మ్యానిఫెస్టోలను విడుదల చేయగా విశాల్ జట్టుకు గెలిచే అవకాశం ఉన్నట్లు ఓ ఫిలిమ్ ఇనిస్టిట్యూట్ సర్వేలో తేలింది. విశాల్ జట్టు 64 శాతం, శరత్ కుమార్ జట్టు 26 శాతం ఓట్లు పడతాయని ఆ సర్వేలో తేలింది. విశాల్ ప్యానల్ మొత్తం 41 పాయింట్లతో ఇచ్చిన మేనిఫెస్టో పట్ల నడిగర్ సంఘంలోని సభ్యులు సంతృప్తిని వ్యక్తం చేస్తున్నట్లు వార్తలు వస్తున్నాయి. విశాల్ ఆధ్వర్యంలో తమకు న్యాయం జరుగుతుందని వారు అనుకుంటున్నట్లు తెలుస్తోంది. ఐతే కమల్ హాసన్ వెనకుండి నడిపిస్తున్న విశాల్ ప్యానల్‌కు అక్టోబరు 11న ఫిట్టింగ్ రిప్లై ఇస్తానంటూ శరత్ కుమార్ ప్రకటించారు. మరి ఆ ఫిట్టింగ్ రిప్లై ఎలా ఉంటుందో వెయిట్ అండ్ సీ.
