ఎవడే సుబ్రమణ్యం? సినిమాతో తెరంగేట్రం చేసిన మాళవిక నాయర్.. నటనలో సీనియర్ కానీ ఆమె వయస్సు పరంగా చాలా జూనియర్. మెచ్యూరిటీ ఉన్న పాత్రల్లో ఒదిగిపోయే ఈ ముద్దుగుమ్మ.. ప్రస్తుతం ప్లస్ టూ చదువుతోంది. ఇంకా సోమవారమే మేజరయ్యింది.
సోమవారం ఆమె తన 18వ పుట్టినరోజు వేడుకని కళ్యాణ వైభోగమే టీమ్‌తో కలిసి జరుపుకుంది. ఈ సందర్భంగా కొత్త నిర్ణయాల్ని ప్రకటించింది. తెలుగు ఇండస్ట్రీ చాలా బాగుందని ఇకనుంచి ఇక్కడే కంటిన్యూ అవుతానని స్పష్టం చేసింది. అయితే ఇప్పటికప్పుడు ఏ సినిమా ఒప్పుకోననీ మార్చిలో పరీక్షలు పూర్తి చేశాకే కొత్త సినిమాల గురించి ఆలోచిస్తానని వెల్లడించింది.
ఇంత చిన్న వయసులో అంత మెచ్యూర్ క్యారెక్టర్లు ఎలా చేస్తున్నావని అడిగితే... "నా మనసుకు ఒక పాత్ర దగ్గరైందంటే చాలు.. అందులో ఇట్టే ఒదిగిపోతా. పైగా చిన్నప్పట్నుంచీ నేను నటిస్తున్నా. పలు సినిమాల్లో అక్కగా చెల్లిగా నటించిన అనుభవం ఉంది. అందుకే పాత్రల్ని తొందరగా ఆకళింపు చేసుకొంటుంటా`` అని చెప్పుకొచ్చింది మాళవిక. సొంత రాష్ట్రం కేరళనే అయినా... తన కుటుంబం మాత్రం ఢిల్లీలోనే ఉంటుందట. సైన్స్, ఆర్ట్స్, పెయింటింగ్స్ అంటే తనకు చాలా ఇష్టమని వెల్లడించింది.
