భజరంగీ భాయ్ జాన్‌తో పాకిస్థాన్ జర్నలిస్ట్ చాందీ నవాబ్ హిట్టయ్యాడు. నిన్నటి వరకు పాకిస్థాన్‌లో సాధారణ జర్నలిస్టుగా జీవితం గడిపిన వ్యక్తిని భారతీయ సినిమా సెలబ్రిటీగా మార్చేసింది. సల్మాన్ ఖాన్ తాజా సినిమా 'భజరంగీ భాయ్ జాన్'లో నవాజుద్దీన్ సిద్దిఖీ నటించిన పాత్ర 'చాంద్ నవాబ్'కు పాకిస్థాన్ జర్నలిస్ట్ చాంద్ నవాబ్ స్ఫూర్తి. పాకిస్థాన్‌లోని కరాచీ రైల్వే స్టేషన్‌లో వార్తలు సేకరించి ఇచ్చేవాడు.
చాంద్ నవాబ్ 'పీ టూ సీ' చెబుతుండగా చాలామంది కెమెరాలో కనబడాలని అడ్డం వచ్చేవారు. అలాంటప్పుడు ఆయన వారిపై విరుచుకుపడేవాడు. ఇంకొందరికి సర్ది చెప్పేవాడు. మరి కొందర్ని అదిలించేవాడు. దీనిని అతని స్నేహితులు వీడియోగా రూపొందించి సోషల్ మీడియాలో 2008 డిసెంబర్ 8న అప్ లోడ్ చేశారు.
ఆ వీడియోకి మంచి ఆదరణ లభించింది, చాలా మందికి నవ్వులు పంచింది. దీనిని స్ఫూర్తిగా తీసుకున్న కబీర్ ఖాన్ 'భజరంగీ భాయ్ జాన్'లో చాంద్ నవాబ్ పాత్రను పెట్టారు. ఈ పాత్ర పాకిస్థాన్‌లో చాంద్ నవాబ్‌కు విపరీతమైన పేరుప్రతిష్ఠలు తీసుకొచ్చింది. ఇప్పుడు చాంద్ నవాబ్ అక్కడ సెలబ్రిటీగా మారాడు.
ఇంకా ఆయనతో సెల్ఫీ తీసుకునేందుకు, ఫోటోలు దిగేందుకు, ఇంటర్వ్యూ తీసుకునేందుకు ఎగబడుతున్నారు. దీంతో తనను సెలబ్రిటీని చేసిన సల్మాన్ ఖాన్, కబీర్ ఖాన్‌కు చాంద్ నవాబ్ ధన్యవాదాలు తెలిపాడు. వారిని కలిసేందుకు అపాయింట్‌మెంట్ కూడా ఇచ్చారని, వారిని కలిసినప్పుడు తనకు కొంత డబ్బులు ఇస్తే బాగుంటుందని అభిప్రాయపడుతున్నాడు. మరి సల్మాన్ ఖాన్ ఏం చేస్తారో.. వెయిట్ చేసి చూడాల్సిందే..!
