"ప్రేమిస్తే" చిత్రం ద్వారా తెలుగు తెరకు పరిచయమైన యంగ్ హీరోయిన్ "సంధ్య". ఈ సినిమా తర్వాత సంధ్య వెండితెరపై అసలు కన్పించడంలేదని, ఎందుకో చాలా గ్యాప్ తీసుకుందని సినీ వర్గాల్లో వార్తలు షికార్లు చేస్తున్నాయి. ఒకవైపేమో ఆమెకు ఛాన్స్‌లే రాలేదని కొందరంటుంటే, మరోవైపు ఆమెకు ఛాన్స్‌లొచ్చినా.. ఆ క్యారెక్టర్లు సంధ్యకు ఏమాత్రం నచ్చకే స్క్రీన్‌పై మళ్ళీ కనిపించలేదని అంటున్నారు.
ఈ విషయమై సంధ్యను కదిలిస్తే.. ఆమె కూడా అదే సమాధానమిచ్చింది. అంతేకాదు.. ప్రతిరోజూ తాను ఏరోబిక్స్ చేస్తానని, చిన్న చిన్న వ్యాయామాలు చేస్తుంటానని కూడా చెప్పింది. ఇంతకీ అసలు విషయమేమిటంటే..? "ప్రేమిస్తే" ద్వారా తనకు గుర్తింపు వచ్చిందని, ఆ తర్వాత కూడా అలాంటి పాత్రలే తనను వెతుక్కుంటూ వచ్చాయని చెప్పింది. దీంతో బోర్ కొట్టి అలాంటి చిత్రాల్లో నటించేందుకు అంగీకరించలేదని సంధ్య స్పష్టం చేసింది.
అందుకే భిన్నంగా చేయాలని వల్లభ, అన్నవరం సినిమాల్లో నటించానని, కానీ ఈ చిత్రాల సమయంలో దర్శక, రచయితలచే చాలా మోసపోయానని వాపోయింది. దర్శక, రచయితలు తనకు కథంతా వినిపించి, తన మీదే కథ నడుస్తుందని నమ్మించి, ఆ తర్వాత తనపై తీసిన కొన్ని సన్నివేశాలను ఎడిటింగ్ చేశారని సంధ్య తెలిపింది.
ఇలా చేయడం ద్వారా తన అంచనాలన్నీ తారుమారయ్యాయని ఈ ముద్దుగుమ్మ మనసులోని ఆవేదనను వెలిబుచ్చింది. ఈ కారణంతోనే చాలా గ్యాప్ తీసుకున్నానని, తాజాగా సంగీత సోదరుడు పరిమళ్ హీరోగా "లేచిపోదామా" చిత్రంలో నటిస్తున్నానని తెలిపింది. ఈ సినిమాలోని తన క్యారెక్టర్ చాలా బాగుంటుందని, కథంతా తన చుట్టూ తిరుగుతుందని సంధ్య పేర్కొంది. ఇంకేముంది.. సంధ్యకు నచ్చిన పాత్ర దొరికిందన్నమాట..!. ఇకనైనా సంధ్యకు నచ్చిన పాత్రలే దొరకాలని ఆమెకు మనం కూడా ఆల్ ది బెస్ట్ చెబుదామా..?
