''కత్తి''కి కష్టాలొచ్చి పడ్డాయి. విజయ్ తలైవా సినిమాను కూడా వివాదాలు వెంటాడాయి. అమ్మ జయలలితను ఉద్దేశించి డైలాగ్స్ ఉండటంతో ఈ సినిమాకు ఎన్నో ఇక్కట్లు ఎదురయ్యాయి. ఈ ఇక్కట్లే ఆ సినిమా ఫట్ అయ్యింది. ఇదే తరహాలో కత్తికి కూడా కష్టాలు తప్పకపోవడంతో ఆ సినిమా కూడా ప్లాప్ అయ్యే అవకాశం ఉన్నట్లు తెలుస్తోంది. దీంతో విజయ్ ఫ్యాన్స్ బాధపడితున్నారు.
ఇలయ దళపతి విజయ్, సమంతలు హీరోహీరోయిన్లుగా నటించిన తమిళ యాక్షన్ థ్రిల్లర్ 'కత్తి'. ఈ చిత్రంపై నెలకొన్న వివాదం రోజురోజూకు ముదురుతోంది. ఏఆర్ మురుగదాస్ దర్శకత్వం వహించిన కత్తి చిత్రాన్ని లైకా ప్రొడక్షన్స్ నిర్మించింది. అయితే ఈ నిర్మాణ సంస్థతో శ్రీలంక అధ్యక్షుడు రాజపక్సేకు సంబంధాలున్నాయంటూ ఆరోపణలు వెలువడడం వివాదానికి దారితీసింది.
అసలే ఈళం తమిళుల ఊచకోత ఘటనలతో రాజపక్స పై మండపితోన్నతమిళ ప్రజలు కత్తి చిత్ర బ్యానర్‌పై ఆగ్రహం వ్యక్తం చేస్తున్నారు. ఈ చిత్రం బ్యానర్ నుంచి లైకా పేరు తొలగించాలని వారు కత్తి నిర్మాతలను డిమాండ్ చేస్తున్నారు. అయితే కత్తి చిత్రాన్ని బుధవారం ఎట్టి పరిస్థితుల్లోనైనా విడుదల చేసి తీరుతామని నిర్మాతలు స్పష్టం చేశారు.
ఈ స్థితిలో సోమవారం అర్థరాత్రి చెన్నై మహానగరంలోని మౌంట్‌ రోడ్డులో ఉన్న రెండు సినిమా థియేటర్లపై తమిళ సంఘాల వాళ్లు రాళ్లు రువ్వి, పెట్రోల్ బాంబులు విసిరి విధ్వంసం సృష్టించారు. దీంతో తమిళనాడు రాష్ట్రవ్యాప్తంగా థియెటర్ల వద్ద తీవ్ర ఉద్రిక్తత నెలకొంది. సినిమా థియేటర్ల వద్ద భారీగా పోలీసులను మెహరించారు. ఈ సంఘటనపై పోలీసులు ఆరుగురిని అరెస్టు చేసి విచారిస్తున్నట్టు సమాచారం.
