తెలుగు చిత్ర పరిశ్రమకు చెందిన హాస్య నటుడు ఎంఎస్ నారాయణ హఠాన్మరణం తెలుగు చిత్ర పరిశ్రమకు తీరని లోటు. ముఖ్యంగా తాగుబోతు పాత్రలకు ఆయనలాంటి మరో నటుడు దొరకడం చాలా అరుదని చిత్రపరిశ్రమకు చెందిన పలువురు ప్రముఖులు వ్యాఖ్యానిస్తున్నారు. అందుకే అంటారు తాగుబోతు పాత్రల పేటెంట్ ఎంఎస్ నారాయణ అని. ముఖ్యంగా ఆయన అతి తక్కువ కాలంలోనే చిరస్మరణీయమైన గుర్తింపును తెచ్చుకున్నారు.
ప్రధానంగా తెలుగు సినిమాల్లో పేరడీలతో ఆయన ప్రేక్షకులకు మరింత దగ్గరయ్యారు. ఏ సినీ హీరో పాత్రలోనైనా ఇట్టే ఒదిగిపోయే ఎంఎస్, తెలుగు ప్రేక్షకులను కడుపుబ్బా నవ్వించారు. 'దూకుడు' సినిమాలో పలువురు అగ్రహీరోల పేరడీలతో రూపొందించిన సీన్‌ను తెలుగు ప్రజలు ఎప్పటికీ మరిచిపోరు. ఆ సీన్‌లో ఎంఎస్ విభిన్న రీతుల్లో కనిపించి, సదరు పాత్రల రియల్ హీరోలను మరిపించడమే కాక, హాస్యాన్ని పండించారు.
తెలుగు చిత్రసీమలోని దాదాపుగా హీరోలందరి పేరడీల్లోనూ ఎంఎస్ కనువిందు చేశారు. అంతేకాకుండా పలువురు బాలీవుడ్ హీరోలతో పాటు రాజకీయ నాయకుల రూపాల్లో వేషాలు వేసి ఎంతగానో ఆకట్టుకున్నారు. ముఖ్యంగా.. ఢిల్లీ రాజకీయ సంచలనం అరవింద్ కేజ్రీవాల్ రూపంలో కనిపించిన ఎంఎస్, ఆ పాత్రలో చక్కగా ఒదిగిపోయారు. ఇక మందుబాబు పాత్ర ఎంఎస్‌కు బ్రాండ్ ఇమేజ్‌గా మారిందనే చెప్పొచ్చు.
