ఈ తరం కుర్రాళ్ల భావోద్వేగాలు, జీవితం పట్ల వాళ్లకుండాల్సిన స్పష్టత ప్రధానాంశాలుగా పట్టణ నేపథ్యంలో సాగే చిత్రం 'ముకుంద'. ఇందులో రూరల్ అర్బన్ కుర్రాడిగా మెగా బ్రదర్ నాగబాబు తనయుడు వరుణ్ తేజ్ నటించారు. మెగా ఫ్యామిలీ నుంచి వస్తున్న ఈ హీరో నటించిన ఈ తొలి చిత్రంపై భారీ అంచనాలున్నాయి. 'కొత్త బంగారు లోకం', 'సీతమ్మ వాకిట్లో సిరిమల్లె చెట్టు' చిత్రాలతో తనకంటూ ఓ శైలిని ఏర్పరచుకున్న శ్రీకాంత్ అడ్డాల దర్శకత్వం వహించిన చిత్రం ఇది.
ఠాగూర్ మధు సమర్పణలో నల్లమలుపు శ్రీనివాస్ (బుజ్జి) ఈ చిత్రాన్నినిర్మిస్తున్నారు. ప్రస్తుతం నిర్మాణానంతర కార్యక్రమాలు జరుగుతున్నాయి. ఇందులో పూజా హెగ్డే కథానాయికగా నటించింది. ఈ చిత్రానికి మిక్కీ.జె. మేయర్ పాటలు స్వరపరిచారు. వచ్చే నెల 3న పాటలను, 24న ఈ చిత్రాన్ని విడుదల చేయడానికి సన్నాహాలు చేస్తున్నారు.
ఈ సందర్భంగా దర్శకుడు మాట్లాడుతూ - ''వరుణ్ తేజ్ అద్భుతంగా నటిస్తున్నాడు. కుటుంబ సమేతంగా చూడదగ్గ కథాంశంతో ఈ చిత్రం ఉంటుంది. మిక్కీ జె. మేయర్ స్వరపరచిన పాటలు హైలైట్‌గా నిలుస్తాయి. నిర్మాతలు ఏ విషయంలోనూ రాజీపడలేదు'' అని చెప్పారు.
నిర్మాతలు మాట్లాడుతూ - ''ఈ చిత్రం ఫస్ట్ లుక్‌కి మంచి స్పందన లభించింది. వరుణ్ చాలా బాగున్నాడని, మంచి మాస్ హీరో అనిపించుకుంటాడని అందరూ అంటున్నారు. డాన్సులు, ఫైట్స్ అన్నీ బాగా చేశాడు. ఈ చిత్రం ఖచ్చితంగా తనకు మంచి లాంచింగ్ అవుతుందనే నమ్మకం ఉంది'' అన్నారు. నాజర్, ప్రకాశ్‌ రాజ్, బ్రహ్మానందం, రావు రమేశ్ ఇతర పాత్రధారులు. ఈ చిత్రానికి సంగీతం: మిక్కీ జె.మేయర్, కెమెరా: మణికందన్, నిర్మాణం: లియో ప్రొడక్షన్స్.
